Տեխասում ԱՄՆ-ից նահանգի անջատվելու հարցով հանրաքվե են պահանջել

Տեխասի նահանգում Հանրապետական կուսակցության ներկայացուցիչները պահանջում են 2023թ. հանրաքվե անցկացնել՝ պարզելու համար, թե արդյոք նահանգը պետք է դուրս գա ԱՄՆ-ի կազմից, նշվել է Հյուսթոնում կուսակցության Տեխասի բաժանմունքի համագումարում ընդունված բանաձևում։

«Տեխասի Սահմանադրության 1-ին բաժնի հոդվածին համապատասխան՝ դաշնային կառավարությունը խախտել է մեր տեղական ինքնակառավարման իրավունքը։ Տեխասի փոփոխություններ կատարելու իրավունքներն անտեսում են, մերժում և զրոյացնում։ Տեխասը ԱՄՆ-ից անջատվելու իրավունք ունի, և Տեխասի օրենսդրական ժողովը ըստ այդմ պետք է հանրաքվե իրականացնի»,- նշվել է փաստաթղթի դրույթներից մեկում, որը վերնագրված է «Նահանգի ինքնիշխանությունը»։

Բազմաթիվ էջերից բաղկացած փաստաթղթով տեղի օրենսդիրներին կոչ է արվում «հաջորդ նստաշրջանի ժամանակ ընդունել օրինագիծ, որով կպահանջվի Տեխասի ժողովրդի համար համընդհանուր հանրաքվե անցկացնել 2023թ.՝ պարզելու համար, թե արդյոք նահանգը պետք է վերականգնի անկախ պետության իր կարգավիճակը»։

Բացի այդ, մեկ այլ բաժնում հանրապետականները հայտարարել են, որ հրաժարվում են ընդունել ԱՄՆ 2020թ. նախագահական ընտրությունների արդյունքները, ուստի չեն ընդունում դեմոկրատ Ջո Բայդենի լիազորությունները՝ որպես պետության գործող ղեկավարի։

«Մենք մերժում ենք 2020թ. նախագահական ընտրությունների արդյունքները և կարծում, որ նախագահի պարտականությունները կատարող Ջո Բայդենն օրինական չի ընտրվել ԱՄՆ ժողովրդի կողմից»,- նշվել է բանաձևում։

News.am