Ուկրաինայի վրա շարունակվող հարձակումները ցույց են տալիս, որ Ռուսաստանի նախագահ Վլադիմիր Պուտինը չի հետաքրքրված խաղաղությամբ, հայտարարել է Մեծ Բրիտանիայի վարչապետ Քեյր Սթարմերը ԱՄՆ նախագահ Դոնալդ Թրամփի հետ համատեղ մամուլի ասուլիսում: Բանակցությունները տեղի են ունեցել Թրամփի Մեծ Բրիտանիա կատարած պետական այցի ընթացքում, որն ավարտվել է հինգշաբթի երեկոյան:
«Վերջին օրերին Պուտինը ցույց է տվել իր իրական դեմքը՝ կազմակերպելով ներխուժումից ի վեր ամենամեծ հարձակումը՝ ավելի շատ արյունահեղությամբ, ավելի շատ անմեղ կյանքերի կորստով և ՆԱՏՕ-ի օդային տարածքի աննախադեպ խախտումներով: Սրանք խաղաղություն ցանկացող մարդու գործողություններ չեն», – ասել է Սթարմերը: Վարչապետը նաև ասել է, որ ինքը և Թրամփը քննարկել են, թե ինչպես «մեծացնել ճնշումը Պուտինի վրա՝ նրան ստիպելու հասնել խաղաղության համաձայնագրի»:
Թրամփն ինքը նշել է, որ կարծում է, որ այն պատերազմներից, որոնք նա փորձում է դադարեցնել, Ուկրաինայում զինված հակամարտության լուծումը «ամենահեշտը» կլինի Վլադիմիր Պուտինի հետ իր հարաբերությունների շնորհիվ: «Բայց նա հիասթափեցրել է ինձ: Նա իսկապես հիասթափեցրել է ինձ», – կրկնել է Թրամփը: ԱՄՆ նախագահը նաև դժգոհություն է հայտնել այն փաստի կապակցությամբ, որ որոշ երկրներ շարունակում են գնել ռուսական նավթ՝ փաստացի ֆինանսավորելով Ռուսաստանի ագրեսիան Ուկրաինայի դեմ: «Եթե նավթի գները անկում ապրեն, Պուտինը չի ունենա այլընտրանք, քան դադարեցնել պատերազմը», – ընդգծեց Թրամփը։
ԱՄՆ նախագահը ուղղակիորեն չպատասխանեց լրագրողների հարցերին այն մասին, թե կոնկրետ ինչ է պատրաստվում անել Պուտինի վրա ճնշում գործադրելու համար։ «Հուսով եմ՝ շուտով լավ լուրեր կունենանք ձեզ համար», – ասաց Թրամփը։
News.am
