Վրաստանը դեսպանի մակարդակով չի մասնակցի հոկտեմբերի 20-ին Լյուքսեմբուրգում նախատեսված կապի հարցերով նախարարական հանդիպմանը, որին Եվրոպական արտաքին գործողությունների ծառայությունը հրավիրել է Կենտրոնական Ասիայի և Արևելյան գործընկերության երկրների՝ Հայաստանի, Ադրբեջանի, Թուրքիայի, Թուրքմենստանի, Ուզբեկստանի, Տաջիկստանի, Ղազախստանի և Ղրղզստանի արտգործնախարարներին։ Այս մասին ասվում է Վրաստանի արտաքին գործերի նախարարության հայտարարության մեջ, փոխանցում է Վրաստանի «Առաջին ալիքը»։
«Հաշվի առնելով այս թեմայի կարևորությունը և Վրաստանի դերը կապի հարցերում, դեսպանների մակարդակով նախարարական հանդիպման հրավերը անընդունելի է և նման մոտեցման հիմնավորումը մնում է անհասկանալի։ Եվրոպական արտաքին գործողությունների ծառայությունը մի քանի շաբաթ առաջ տեղեկացվել է այս հանդիպմանը մասնակցելու վերաբերյալ Վրաստանի դիրքորոշման մասին։ Հաշվի առնելով Վրաստանի դերը թե՛ տարածաշրջանային անվտանգության, թե՛ կապի հարցերում, Վրաստանի մասնակցությունը նման կարևոր քննարկումներին պետք է տեղի ունենա համապատասխան մակարդակով և բխի ԵՄ անդամ պետությունների շահերից։
Վրաստանին Եվրոպական արտաքին գործողությունների ծառայության կողմից նախատեսված նախարարական հանդիպմանը դեսպանների մակարդակով հրավիրելը ցույց է տալիս Եվրոպական միության ինստիտուտների կողմից անլուրջ վերաբերմունքը։ Սա ցույց է տալիս ոչ միայն աշխարհաքաղաքական, այլև պարզ աշխարհագրական իրականության անտեսումը և ներկայացնում է Վրաստանի ԵՄ միջոցառումներին հրավիրելու հարցը քաղաքական սպեկուլյատիվ նպատակներով շահագործելու, ինչպես նաև Վրաստանում արմատական օրակարգ և բևեռացում խթանելու ևս մեկ փորձ։ Մենք հույս ունենք, որ ԵՄ անդամ պետությունների մեծամասնությունը լավ գիտակցում է աշխարհաքաղաքական կարիքները, գնահատում է Վրաստանի հետ գործընկերությունը, նրա դերը Եվրոպայի և Ասիայի միջև կապի մեջ և չի կիսում Եվրոպական արտաքին գործողությունների ծառայության վերաբերմունքը Վրաստանի մասնակցության նկատմամբ», – ասվում է հայտարարության մեջ։
News.am
