Պետերբուրգցի նախկին պաշտոնյա Բորիս Ավագյանի մարմինը, որը չորեքշաբթի օրը հայտնաբերվել էր Սանկտ Պետերբուրգում Հայաստանի հյուպատոսության շենքում, կուղարկեն դատաբժշկական փորձաքննության։ ՌԻԱ Նովոստիին այս մասին հայտնել են իրավապահ մարմիններում:
Ավելի վաղ Ռուսաստանում Հայաստանի դեսպան Գուրգեն Արսենյանը բացառել էր Բորիս Ավագյանի սպանության վարկածը։
«Ավագյանի մարմինը դիահերձարանում է, կանցկացվի դատաբժշկական փորձաքննություն՝ մահվան պատճառները պարզելու համար»,-ասել է գործակալության զրուցակիցը:
Հիշեցնենք` Բորիս Ավագյանին մահացած են գտել Սանկտ Պետերբուրգում ՀՀ գլխավոր հյուպատոսությունում։ Նախորդ օրը նա փախել էր Սանկտ Պետերբուրգի Կրոնշտադտի դատարանից։ Նախնական տեղեկություններով՝ Ավագյանն ինքնասպան է եղել։
Դեպքից առաջ նրան բերել էին դատարան՝ խափանման միջոց ընտրելու համար, դատախազությունը նրան կալանավորելու միջնորդություն էր ներկայացրել: Ավագյանը մեղադրյալ էր մաքսային վճարներից խուսափելու գործով։ Ավելի ուշ գործը կասեցվել էր ՌԴ ՊՆ-ի հետ պայմանագիր կնքելու կապակցությամբ՝ հատուկ ռազմական գործողությանը մասնակցելու համար: Սակայն հատուկ գործողության գոտի նախկին պաշտոնյան այդպես էլ չէր մեկնել, այդ պատճառով էլ դատարանին միջնորդություն էր ներկայացվել գործը վերսկսելու մասին։
Sputnik Արմենիա
