Մերձավանում կատարված սպանության գործով ՀՀ քննչական կոմիտեն նոր իրեղեն ապացույցներ է ներկայացրել։ ՔԿ մամուլի ծառայությունից հայտնում են, որ գործով ձերբակալվածին պատկանող շինությունում հայտնաբերվել են Քրեական օրենսգրքով արգելված իրեր, որոնք հանցագործության հետ վերջինիս առնչությունը հաստատող բացահայտ հետքեր են։
Ավելի վաղ հայտնել էիք, որ Մերձավանում Փարաքար համայնքի ղեկավար Վալոդյա Գրիգորյանի սպանության կասկածանքով ձերբակալված անձ կա։ Լրատվամիջոցները հայտնել էին, որ իրավապահները խուզարկում են կասկածյալ Նարեկ Օհանյանի տունը, որը Մերձավանի նախկին համայնքապետ, ՔՊ-ական Մհեր Ախտոյանի հորաքրոջ որդին է և այս տարվա փետրվարին Մերձավանում սպանված Գրիգոր Օհանյանի եղբայրը:
«Հայտնաբերվել է հանցագործության կատարման պահին օգտագործված դիմակը, ձեռնոցները, կոշիկները, բաճկոնը, գիշերային տեսանելիության սարքը, որոնք վերջինս փորձել է այրման եղանակով ոչնչացնել: Քրեական վարույթի նախաքննության ընթացքում կատարվում են բազմաթիվ ապացուցողական և վարութային գործողություններ՝ դեպքի ամբողջական հանգամանքները պարզելու, այդ թվում՝ հանցագործության գործիք հանդիսացող ինքնաձիգը հայտնաբերելու ուղղությամբ»,– նշել են ՀՀ քննչական կոմիտեից։
Հիշեցնենք` սեպտեմբերի 23-ի ուշ երեկոյան Մերձավանում` Փարաքար համայնքի ղեկավար Վալոդյա Գրիգորյանի նորակառույց առանձնատան հետնամասում, դիմակավորված, ձեռնոցներով անձը մոտեցել է կանգնած 3 անձանց, կրակահերթ արձակել և հեռացել: Միջադեպի հետևանքով սպանվել են Վալոդյա Գրիգորյանը և ՀՀ ոստիկանության քրեական հետախուզության գլխավոր վարչության օպերլիազոր Կարեն Աբրահամյանը, որը դեպքի պահին ծառայության մեջ չի եղել։ Դեպքի վայրում վիրավորում է ստացել ևս մեկ քաղաքացի` Արծրուն Գալստյանը։
Sputnik Արմենիա
