Իշխող «Վրացական երազանք» կուսակցության քաղաքապետի թեկնածուները 100% արդյունքով հաղթել են ընտրություններում 26 մունիցիպալիտետներում, հայտնում է «Նովոստի-Գրուզիա»-ն։
Վրաստանի ԿԸՀ նախնական տվյալների համաձայն, դրանք են՝ Սագարեջո, Գուրջաանի, Դեդոփլիսծղարո, Քվարելի, Թիանեթի, Գարդաբանի, Դմանիսի, Ծալկա, Թեթրիծղարո, Ախալցիխե, Ադիգենի, Ասպինձա, Ախալքալաքի, Նինոծմինդա, Օնի, Ամբրոլաուրի, Ծագերի, Լենթեխի, Մեստիա, Սաչխերե, Բաղդաթի, Վանի, Թքիբուլի, Փոթի, Աբաշա և Մարտվիլի։
Մյուս 38 մունիցիպալիտետներում քաղաքապետի ընտրություններում իշխող կուսակցությունը նույնպես հաղթում է, սակայն մի փոքր ավելի ցածր արդյունքներով․ այնտեղ մրցակիցներ, այնուամենայնիվ, ունեցել են, 27 դեպքում՝ ընդամենը մեկը։
Համեմատաբար բարձր մրցակցություն է եղել Թբիլիսիում։ «Վրացական երազանքը» ներկայացնող գործող քաղաքապետ Կախա Կալաձեի հետ միասին պաշտոնի համար պայքարել է ևս ութ թեկնածու։
Կալաձեն ստացել է ձայների 71,621%-ը։ Երկրորդ արդյունքը «Ուժեղ Վրաստան» և «Գախարիան հանուն Վրաստանի» ընդդիմադիր կուսակցությունների թեկնածու Իրակլի Կուպրաձեինն է՝ 12,275%, երրորդը՝ «Գիրչի»-ի առաջնորդ Յագո Խվիչիայինը (7,624%)։
Միևնույն ժամանակ, մայրաքաղաքի ընտրողները աննախադեպ պասիվություն են դրսևորել։ Թբիլիսիում մասնակցությունը կազմել է 31,08%, իշխող կուսակցության կառավարման տարիներին նման ցածր ցուցանիշ երբևէ չի գրանցվել։
Երկրի մասշտաբով քվեարկել է 1 438 116 քաղաքացի կամ ընտրողների ընդհանուր թվի 40,93%-ը։ Այս ցուցանիշը նույնպես զիջում է վերջին տասնամյակի տեղական ընտրությունների մասնակցությանը։
Երկրում անմիջապես «Վրացական երազանք» կուսակցությունը հավաքում է ավելի քան 81,689%։
Համայնքային ընտրությունները կայացած են համարվում ցանկացած մասնակցության դեպքում։ Քաղաքապետ ընտրվելու համար թեկնածուն պետք է ստանա ձայների 50%-ը։ Սակրեբուլոները (քաղաքային ժողովներ) համալրվում են մեծամասնական և համամասնական համակարգերով։ Երկրորդ դեպքում կուսակցությունների համար անցողիկ շեմը կազմում է 4%։
Հոկտեմբերի 4-ին կայացած ընտրություններին մասնակցել է 12 կուսակցություն։ Ութ խոշոր ընդդիմադիր քաղաքական միավորումներ բոյկոտել են քվեարկությունը՝ իրենց կողմնակիցներին հավաքելով Թբիլիսիում բողոքի ակցիայի։ Տեղի են ունեցել նաև անկարգություններ։
News.am
