Ադրբեջանի պետական անվտանգության ծառայության պետ, ռազմագերիների, պատանդների և անհայտ կորած քաղաքացիների հարցերով պետական հանձնաժողովի նախագահ Ալի Նագիևը անսպասելիորեն «հույս է հայտնել, որ Հայաստանի համապատասխան Պետական հանձնաժողովի հետ նպատակային շփումները կշարունակվեն և դրական ներդրում կունենան երկու կողմից անհայտ կորածների ճակատագրերի պարզաբանման գործում»։
Ինչպես հայտնում է Report-ը, նա այս մասին ասել է Բաքվում կայացած «Ջանքերի միավորում և համագործակցության ընդլայնում անհայտ կորած անձանց խնդրի լուծման համար» թեմայով միջազգային կոնֆերանսում։
Ա. Նագիևի խոսքով՝ 2025 թվականի օգոստոսին Վաշինգտոնում ստորագրված եռակողմ հռչակագիրը, փետրվարին Ադրբեջանի և Հայաստանի համապատասխան պետական հանձնաժողովների միջև տեղի ունեցած առաջին հանդիպումը և հետագա շփումները, ինչպես նաև տեղեկատվության որոշակի փոխանակումը նոր հույսեր են ներշնչում այս ոլորտում։ Հիշեցնենք, որ նախորդ երեք տասնամյակների ընթացքում Ադրբեջանը համառորեն հրաժարվում էր համագործակցել այս կարևոր մարդասիրական հարցի շուրջ։
News.am
