Ելիսեյան պալատը հայտարարել է Ֆրանսիայի նոր կառավարության կազմը։ Սակայն ծայրահեղ ձախ և ծայրահեղ աջ կուսակցությունների միջև բախումը կարող է հանգեցնել դրա անխուսափելի հրաժարականին, հաղորդում են Reuters-ը և BBC-ն։
Ֆրանսիայի վարչապետի պաշտոնում վերանշանակված Սեբաստիան Լեկորնյուն իրենց պաշտոններում է թողել արտաքին գործերի նախարար Ժան-Նոել Բառոյին և արդարադատության նախարար Ժերալդ Դարմանենին։
Ամենաուշագրավ փոփոխությունը Փարիզի ոստիկանության պրեֆեկտ Լորան Նունյեսի նշանակումն է եղել ներքին գործերի նախարարի պաշտոնում, որը փոխարինել է պահպանողական Հանրապետական կուսակցության առաջնորդ Բրունո Ռետայոյին, ով ունի նախագահւ պաշտոնում իր սեփական հավակնությունները։
Նախկին վարչապետ Էլիզաբեթ Բորնը կորցրել է կրթության նախարարի պաշտոնը և նրան փոխարինել է պետական ծառայող Էդուարդ Ջեֆրին։
Պաշտպանության նախարարի պաշտոնում Լեկորնուի փոխարեն նշանակվել է կենտրոնամետ աջակողմյան վետերան Կատրին Վոտրենը։ Նախկին վարչապետ Ֆրանսուա Բայրուի օրոք նա զբաղեցրել է աշխատանքի նախարարի պաշտոնը, ինչպես նաև զբաղեցրել է նախարարական պաշտոն նախկին նախագահ Ժակ Շիրակի օրոք։
Մի քանի կարևոր նախարարներ մնացել են պաշտոններում, մասնավորապես՝ արտաքին գործերի նախարար Ժան-Նոել Բարոն և ֆինանսների նախարար Ռոլան Լեսկյուրը։
Միևնույն ժամանակ, ինչպես հաղորդում է BBC-ն, ոչ մի երաշխիք չկա, որ Լեկորնյուի երկրորդ կառավարությունը երկար կգոյատևի։ Ծայրահեղ ձախ և ծայրահեղ աջ կուսակցությունները մտադիր են անհապաղ անվստահության քվե առաջադրել Կաբինետի դեմ։
Չափավոր ձախակողմյան կուսակցությունները պահանջում են, որ վարչապետը կասեցնի կենսաթոշակային տարիքը 64 տարեկան բարձրացնելու բարեփոխումը, մինչդեռ կենտրոնամետ աջակողմյանները, ընդհակառակը, պահանջում են չդադարեցնել այն։
Եթե այս փոխադարձաբար բացառող պահանջները չբավարարվեն, երկու քաղաքական ուժերն էլ սպառնում են աջակցել անվստահության քվեարկությանը: Եթե մեծամասնական ձայներ հավաքվեն, նոր կառավարությունը ստիպված կլինի հրաժարական տալ:
News.am
