Գերմանացի քաղաքագետ Վլադիմիր Սերգիենկոն Alpha News-ի հետ զրույցում անդրադարձել է այն տեղեկությանը, որ Մեծ Բրիտանիան ամբողջությամբ վերացնում է Հայաստանի և Ադրբեջանի նկատմամբ զենքի մատակարարումների էմբարգոն:
Քաղաքագետի կարծիքով՝ դա ոչ թե Մեծ Բրիտանիայի կողմից խաղաղ կարգավորման գործընթացներին աջակցելն է, այլ տարածաշրջանում բրիտանական ազդեցությունն ուժեղացնելու հնարավորություն:
«Բրիտանական էմբարգոն ընդունվել է 1992 թվականին ԵԱՀԿ նախաձեռնությամբ Լեռնային Ղարաբաղի հակամարտության համատեքստում և պաշտոնապես դադարեցվում է 13.10.2025 թվականից։ Բրիտանիան, իհարկե, տարածաշրջանային առումով հետ է մնում իր ազդեցությունից, և զենքի մատակարարմամբ Կովկաս ներխուժելն իսկապես եզակի հնարավորություն է։ Եվ խոսակցությունն, իհարկե, Բաքվի կամ Երևանի պաշտպանական կարողությունների ամրապնդման մասին չէ։ Դա Մեծ Բրիտանիայի դիվանագիտական դերը չէ հակամարտության կարգավորման կամ հետկոնֆլիկտային խաղաղության ստեղծման գործում, դա աջակցություն չէ խաղաղ կարգավորման գործընթացներին. դրանք պարզապես հնարավորություններ են դիվանագիտական ձիով ներխուժել Կովկաս», — ասել է Սերգիենկոն։
Փորձագետի խոսքով՝ սա որոշակի ծրագիր է, որը կարող է հանգեցնել Կովկասում ապակայունացման։
«Հնարավո՞ր է նոր լարվածություն, եթե կողմերից մեկը սկսի ավելի շատ զենք գնել, քան մյուսը։ Հնարավոր է։ Հնարավո՞ր է տարածաշրջանային ուժերի հավասարակշռության խախտում։ Տարածաշրջանում կան խոշոր ուժեր՝ Ռուսաստան, Թուրքիա, Իրան և Մեծ Բրիտանիա, և էական չէ, թե ով առաջինը կզիջի և կդառնա բրիտանական հենակետ։ Ֆրանսիական հետախուզական ծառայությունները մեծ ներկայություն ունեն Հայաստանում։ Կարծում եմ՝ մենք նույնը կլսենք Ֆրանսիայից ընդամենը մի քանի օրից։ Պետք է նաև տեսնել, որ զենքի մատակարարման խորհրդարանական վերահսկողությունն, այնուամենայնիվ, կմնա Բրիտանիային։ Հետևաբար, կարծում եմ, որ սա խորհրդանշական ժեստ է, այլ ոչ թե կոնկրետ ծրագիր, որը կարող է հանգեցնել Կովկասի անկայունացմանը, քանի որ բրիտանացիները երբեք այլ բան չեն արել»,- եզրափակել է Սերգիենկոն։
