Արքայազն Էնդրյուն՝ Չարլզ III-ի կրտսեր եղբայրը, հայտարարել է, որ հրաժարվում է իր տիտղոսներից, այդ թվում՝ Յորքի դուքսի կոչումից, իր կապերի պատճառով հանցագործ Ջեֆրի Էպշտեյնի հետ։ Համապատասխան հայտարարությունը նա արել է հոկտեմբերի 17-ին։
«Times»-ը նախկինում հաղորդել էր, որ Չարլզ III-ը քննարկում է արքայազն Էնդրյուին տիտղոսից զրկելու հարցը, քանի որ պալատը մի շարք սկանդալներից հետո հասել էր «եռման կետի»։ Նշվել է նաև, որ թագավորը հույս ուներ, որ Էնդրյուն կամավոր կհրաժարվի տիտղոսից։
«Թագավորի, իմ անմիջական շրջապատի և ընտանիքի հետ քննարկումների ընթացքում մենք եզրակացրեցինք, որ իմ դեմ շարունակվող մեղադրանքները շեղում են ուշադրությունը Նորին Մեծության և թագավորական ընտանիքի աշխատանքից։ Ես որոշել եմ, ինչպես միշտ, իմ ընտանիքի և երկրի հանդեպ պարտականությունը դնել առաջին տեղում։ Ես պնդում եմ հինգ տարի առաջ կայացրած որոշումս՝ հեռանալ հասարակական կյանքից։ Նորին Մեծության համաձայնությամբ մենք կարծում ենք, որ ես պետք է այս քայլն անեմ։ Հետևաբար, ես այլևս չեմ օգտագործի իմ տիտղոսը կամ ստացած պարգևները»,- ասվում է Էնդրյուի հայտարարության մեջ, ինչպես հաղորդում է Sky-ը։
Արքայազն Էնդրյուն ընդգծեց, որ «կտրականապես հերքում է» իր դեմ ուղղված մեղադրանքները։ Յորքի դուքսի կարգավիճակից մշտապես զրկվելու համար անհրաժեշտ է խորհրդարանական քվեարկություն, ուստի Էնդրյուի հայտարարությունը ենթադրում է, որ նա կամավոր կհրաժարվի տիտղոսից՝ առանց դրանից զրկվելու։
Լրատվամիջոցների տվյալներով՝ Յորքի դուքսը 2011թ․ փետրվարին նամակ է գրել Էպշտեյնին՝ ընդամենը 12 շաբաթ անց այն հայտարարությունից, թե իբր խզել է նրա հետ բոլոր կապերը։ Նոր ապացույցներ Էնդրյուի և հանցագործ Ջեֆրի Էպշտեյնի մտերմության մասին հայտնվել են վերջերս հրապարակված էլեկտրոնային նամակի մեջ։
1in.am
