Եվրոպական հանձնաժողովը 5 մլն եվրո ֆինանսական աջակցություն կտրամադրի Հայաստանին։ ՀՀ–ի և Եվրոպական հանձնաժողովի միջև «Միջուկային անվտանգության և ճառագայթային պաշտպանության ամրապնդումը Հայաստանում» ֆինանսավորման համաձայնագրի ստորագրման առաջարկությունը հավանության արժանացավ ՀՀ կառավարության այսօրվա նիստի ժամանակ։
ՀՀ տարածքային կառավարման և ենթակառուցվածքների նախարար Դավիթ Խուդաթյանը տեղեկացրեց, որ այս համաձայնագիրը 2024 թ. ընդունված մեկ այլ փաստաթղթի շարունակությունն է, որով արդեն իսկ Հայաստանին հատկացվել է 12.9 մլն եվրո, որով դիզելային գեներատորներ են ձեռք բերվել։
«2011 թ. Ֆուկուսիմայի ատոմակայանի վթարից հետո հաշվարկել են աշխարհում գոյություն ունեցող բոլոր ատոմակայանների ռիսկերը, կազմել սթրես–թեստեր, թե հավանական վթարների դեպքում ինչ խնդիրներ կարող են առաջանալ։ Արդյունքում այդ բոլոր խնդիրների համար հերթով հատկացնում են ֆինանսական միջոցներ»,– տեղեկացրեց նախարարը։
Խուդաթյանի խոսքով` 5 մլն եվրոն կուղղվի արտանախագծային վթարների կառավարմանը, մասնավորապես ջրածնով պայմանավորված ռիսկերի նվազեցմանը և այդ նպատակով ձեռք կբերվեն ջրածնային ռեկոմբինատորներ, որոնք կիրականացնեն ջրածնի այրում։
Այդ ռեկոմբինատորները կտրամադրվեն Մեծամորի ատոմակայանին։
Sputnik Արմենիա
