Հայաստանի գործող իշխանությունները մեկուսացնում, ահաբեկում և նույնիսկ սպանում են այլախոհներին։ Այս մասին հայտարարել է «Ժառանգություն» խմբակցության հիմնադիր Րաֆֆի Հովհաննիսյանը՝ Վաղարշապատում նոյեմբերի 16-ին կայանալիք տեղական ինքնակառավարման մարմինների ընտրություններին նվիրված մամուլի ասուլիսի ժամանակ։
Հովհաննիսյանը հավաստիացրել է, որ «Ժառանգություն»-ից Վաղարշապատի քաղաքապետի թեկնածու Արկադի Փայտյանի գլխավորած թիմը ընտրողներին կվերադարձնի բարձրագույն գաղափարները՝ Խիղճ, Աստված, Հայրենիք և Իրավունքի գերակայություն։
Րաֆֆի Հովհաննիսյանը փաստել է նախընտրական քարոզարշավի ընթացքում բազմաթիվ խախտումների մասին։ Նրա խոսքով՝ խախտումներն ինքնին նորություն չեն, դրանք տեղի են ունեցել անկախացումից ի վեր բոլոր իշխանությունների օրոք։ Այժմ, ըստ քաղաքական գործչի գնահատականի, տեղի է ունենում խախտումների ապոգեյը։
«Իշխանության եկան մեծ խոստումներով՝ ուղղել անցյալը, կառուցել նոր Հայաստան, պահպանել Արցախը, ապահովել եկեղեցու անկախությունը և ժողովրդի իրավունքները։ Արդյունքում մեկուսացնում, ահաբեկում և նույնիսկ սպանում են այլախոհներին։ Իշխանությունը պետք է փոխել ցանկացած գնով», – նշել է Հովհաննիսյանը։
Քաղաքական գործիչը հիշեցրեց, որ նախկինում բողոքում էին նախկին իշխանությունների կողմից վարչական ռեսուրսի օգտագործումից։ Ի՞նչ ենք տեսնում այսօր։ Աննախադեպ լկտի հարձակում, տեռոր և այս ամենը՝ վարչական ռեսուրսի կիրառմամբ, ընդգծել է Հովհաննիսյանը։
Նա կոչ է արել քաղաքացիներին պաշտպանել Սուրբ Աթոռը, որը հավատի գլխավոր աղբյուրն է։ «Ներկայումս այն դարձել է հարձակումների թիրախ։ Նրանք, ովքեր պարտվեցին պատերազմում, հողին հանձնեցին 5 հազար ոսկի տղաների, զիջեցին Հայրենիքը, ստորագրեցին փաստաթղթեր այստեղ և այնտեղ, հիմա հատուկջոկատայինների քողի տակ պարծենում են, որ թիրախավորել են սեփական քաղաքացիներին, անկախ նրանից՝ աշխարհիկ են, թե հոգևորական։ Իրավունքը պետք է հաղթի, այն պատկանում է քաղաքացիներին և դուք պետք է այն իրականացնեք նոյեմբերի 16-ին», – ընդգծել է Րաֆֆի Հովհաննիսյանը՝ հավելելով, որ Հայաստանի օգտին Քիմ Քարդաշյանի կողմից իրականացված գործունեությունը հարյուրապատիկ անգամ ավելի բարձր է և լավ, քան այն, ինչ անում են ՀՀ իշխանությունները։
News.am
