Արարատի մարզի Երասխ գյուղի մոտ գտնվող «Հիշողության բլուր» հուշահամալիրում հարգանքի տուրք է մատուցվել 2020 թվականին ադրբեջանական զինուժի կողմից խոցված ուղղաթիռում գտնվող ռուս օդաչուների հիշատակին:
Միջոցառման մասնակիցները ծաղկեպսակներ և ծաղիկներ են խոնարհել 5 տարի առաջ՝ նոյեմբերի 9-ին, Ադրբեջանի ԶՈւ հրթիռային հարվածից խոցված մայոր Յուրի Իշչուկի և ավագ լեյտենանտ Ռոման Ֆեդինայի կիսանդրիներին:
Ինչպես իր խոսքում նշել է Հայաստանում Ռուսաստանի դեսպան Սերգեյ Կոպիրկինը, զինծառայողները զոհվել են իրենց զինվորական պարտքը կատարելիս:
«Հինգ տարի առաջ երեք երկրների՝ Ռուսաստանի, Հայաստանի, Ադրբեջանի ղեկավարները շատ բարդ, լարված բանակցությունների արդյունքում ընդունեցին եռակողմ հայտարարություն, որը վերջ դրեց Լեռնային Ղարաբաղում ռազմական գործողություններին և հիմք դրեց Հայաստանի և Ադրբեջանի միջև իրավիճակի և հարաբերությունների կարգավորմանն ուղղված միջոցառումների իրականացմանը», – ասել է Կոպիրկինը:
Եվ, նրա խոսքով, ռուսաստանցի զինծառայողները զոհվել են համապատասխան խնդիրների իրականացման ժամանակ։
«Մենք իրավունք չունենք մոռանալ նրանց սխրանքը։ Հավերժ հիշատակ բոլորին, որոնք զոհվել են հայրենիքի հանդեպ իրենց զինվորական պարտքը կատարելիս», – ասել է դեսպանը։
2020թ. նոյեմբերի 9-ին ադրբեջանցի զինվորականները Նախիջևանի կողմից՝ Երասխի մերձակայքում խոցել են Հայաստանի տարածքում տեղակայված ռուսական 102-րդ ռազմաբազայի ավտոշարասյունն ուղեկցող ռուսական Մի-24 ուղղաթիռը: Հրթիռային հարվածի հետևանքով ուղղաթիռը կորցրել է կառավարումը և ընկել Հայաստանի տարածքում գտնվող լեռնային տեղանքում: Անձնակազմի երկու անդամ զոհվել է, մեկը՝ վիրավորվել։
Sputnik Արմենիա
