Երևանի ամանորյա տոնական միջոցառումների և ձևավորման այս տարվա բյուջեն կազմել է 607 միլիոն 645 հազար դրամ։ Այս մասին «Փաստինֆո»-ի հետ զրույցում հայտնել է Երևանի քաղաքապետարանի գովազդի վարչության պետ Արմեն Առաքելյանը։
Նրա խոսքով՝ Երևանի տարբեր հատվածներում արվելու են տոնական ձևավորումներ, լույսերի վառման արարողություններ։ Լինելու է սուրբծննդյան տոնավաճառ, ինչպես նաև ձեռք են բերվելու գլխավոր տոնածառի համար նոր ճյուղեր և լույսեր։
«Մեր մայր տոնածառի կոնստրուկտիվ, մետաղական մասը նորմալ վիճակում է, անհրաժեշտություն է առաջացել ուղղակի ճյուղերն ու լույսերը փոխել։ Վարչական շրջաններում տեղադրվող 10 տոնածառերի համար նոր լույսեր ու գագաթներ են ձեռք բերվել»,- ասել է Առաքելյանը։
Նա հավելել է, որ գնման 2 մրցույթներն արդեն կայացել են, հիմա աշխատանքներն են իրականացվում։
Առաքելյանի խոսքով՝ Երևանի որոշ հատվածներում ամանորյա ձևավորումը նույնն է լինելու, բայց փոփոխություններ էլ կլինեն։
Նշենք, որ այս տարի հոկտեմբերի 31-ից արդեն մեկնարկել են քաղաքի տոնական ձևավորման և գլխավոր տոնածառի հավաքման աշխատանքները։
Հավելենք, որ անցյալ տարի՝ 2024թ–ին, քաղաքային իշխանությունները տոնական միջոցառումների կազմակերպման ու ամանորյա ձևավորման համար ծախսել էին 549 մլն դրամ, իսկ 2023թ–ին՝ շուրջ 627 մլն դրամ։
Sputnik Արմենիա
