«Ռուսական երկաթուղիներ» ընկերությունը հայտնել է, որ սուլֆատային զանգվածով 62 կոնտեյներ տեղափոխող գնացքը Մոսկվայից անցել է Ռուսաստանով, Ղազախստանով և Թուրքմենստանով՝ Իրանի Ապրին նավահանգիստ հասնելով 13 օրում, ինչը 40%-ով ավելի արագ է, քան Սուեզի ջրանցքով նույն հեռավորության վրա ծովային բեռնափոխադրումները: Դրա մասին գրում է Pravda.ru-ն:
Նախատեսվում է, որ գնացքները Ռուսաստանից իրանական Ապրին կմեկնեն շաբաթական երկու-երեք անգամ:
Ինչպես ընդգծել է «Ռուսական երկաթուղիներ Լոգիստիկայի» գլխավոր տնօրեն Օլեգ Պոլեևը, հաճախորդներն աճող հետաքրքրություն են ցուցաբերում այդ երթուղու նկատմամբ, և ընկերությունը պատրաստ է առաջարկելու հուսալի և տեխնոլոգիապես առաջադեմ լուծումներ արտահանման, ներմուծման և տարանցման համար: Մասնագետները կանխատեսում են առաջիկա երեք տարում այս երթուղով տարեկան բեռնափոխադրումների 15-20% աճ և արտահանողների տրանսպորտային ծախսերի 10-15% կրճատում: Փոխադրվող ապրանքների տեսականու ընդլայնումը թույլ կտա ներառել շուտ փչացող և բարձր տեխնոլոգիական բեռներ:
Ապրինի նավահանգիստը գործարկվել է 2025 թվականի մայիսին: Այն մեծ տեսակավորման տերմինալ է, որը ներառում է արագ էլեկտրոնային բեռների ձևակերպման, մաքսային ձևակերպման և տարբեր երկրներից փաստաթղթերի ինտեգրման համար նախատեսված վերբեռնման հարմարություններ: Ապրինից բեռներն այնուհետև տեղափոխվում են կա՛մ Չինաստան, կա՛մ հարավ՝ Իրանի Բանդար Աբբաս նավահանգիստ, իսկ այնտեղից՝ Հնդկաստան:
Սա նշանակում է, որ ցամաքային-ծովային երթուղու ամբողջական լոգիստիկ ցիկլը իրականացվում է «Հյուսիս-Հարավ» Ռուսաստան-Հնդկաստան միջանցքի շրջանակում՝ արևելյան ճյուղի միջոցով: Նախկինում Ադրբեջանի միջով անցնող արևմտյան երթուղին համարվում էր ավելի հեռանկարային, և Ռուսաստանը ներդրումներ կատարեց այնտեղ: Սակայն երբ Բաքուն ամբողջությամբ վերակողմնորոշվեց դեպի արևմտյան կառույցներ, այդ թվում՝ ՆԱՏՕ և սկսեց դիմակայել Մոսկվային, Ռուսաստանը վերանայեց այս հայեցակարգը:
News.am
