ՀՀ Տավուշի մարզի Դիլիջանի ոլորանների հատվածում հրդեհաշիջման ինտենսիվ աշխատանքներ են իրականացվում, հրդեհի մեկուսացում դեռ չկա։ Այս մասին Sputnik Արմենիայի հետ զրույցում ասաց Տավուշի մարզային փրկարարական վարչության բնակչության պաշտպանության բաժնի պետ, փրկարար ծառայության փոխգնդապետ Սարգիս Մարկոսյանը։
Ավելի վաղ տեղեկացրել էինք, որ Տավուշի և Գեղարքունիքի մարզերում խոշոր հրդեհներ են բռնկվել, մեկը` Ադրբեջանի հետ սահմանակից հատվածում։ Երկու մարզում էլ հրդեհի մի քանի օջախ կա, իսկ պատճառները դեռևս հայտնի չեն, պետական մարմինները չեն մեկնաբանում։ Որոշ հատվածներում օջախները դեռ չեն մարվել։ Հրդեհաշիջման աշխատանքներում ներգրավված են և՛ հրշեջ-փրկարարներ, և՛ պարեկներ, և հարակից տարածքների բնակիչներ։ Օգտագործվում է հատուկ տեխնիկա, անօդաչու սարքեր, նույնիսկ ՊՆ ուղղաթիռն է գործի դրվել։
«Փրկարար ծառայության պետ, ՆԳ փոխնախարար Կամո Ցուցուլյանի գլխավորությամբ ձևավորվել է շտաբ, ներգրավված է թվով 163 փրկարար ծառայող, 21 միավոր հրշեջ տեխնիկա, 1 ուղղաթիռ, որը ջուրը բերում է Սևանա լճից։ Փրկարարների հետ համագործակցում են էկոպարեկային ծառայության 95 ծառայողներ։ Հրդեհաշիջման աշխատանքներ են իրականացվում նաև «Կազաչի» տեղամասում»,- նշեց Մարկոսյանը։
Նրա խոսքով՝ երկու հրդեհներն էլ վերահսկելի են, կանխվել է հետագա տարածումը դեպի մոտակա տներ, հյուրատներ և հյուրանոցներ։
Ինչ վերաբերում է դժվարություններին, Մարկոսյանը նշեց, որ աշխարհագրական դիրքն ու ռելիեֆն են բարդացնում իրավիճակը։
ՓԾ փոխգնդապետն ընդգծեց` հրշեջ-փրկարարները 24-ժամյա ռեժիմով են աշխատանքներ իրականացնում։
Sputnik Արմենիա
