Միքայել արքեպիսկոպոս Աջապահյանի գործը Վերաքննիչ դատարանում մակագրվել է դատավոր Էդգար Մանասյանին։ Կազմի մյուս դատավորները Նարինե Հովակիմյանն ու Վաչե Մարգարյանն են։ Այս մասին NEWS.am–ը տեղեկանում է «Դատալեքս» տեղեկատվական կայքից։
Հիշեցնենք, որ Միքայել Սրբազանը իշխանությունը զավթելու հրապարակային կոչ հնչեցնելու գործով դատապարտվել է 2 տարի ժամկետով ազատազրկման։ Նա մեղադրվում է այն բանում, որ «ունենալով մեծ թվով հետևորդներ, նախ՝ 2024 թվականի փետրվարի 3-ին, ապա նաև՝ 2025 թվականի հունիսի 21-ին զանգվածային լրատվության միջոցների ներկայացուցիչներին տրված հարցազրույցների ընթացքում հնչեցրել է իշխանությունը զավթելուն ուղղված հրապարակային կոչեր»։
Հատկանշական է, որ 2020 և 2023 թվականներին ևս Միքայել արքեպիսկոպոսը ռազմական հեղաշրջում իրականացնելու անհրաժեշտության մասին նույնաբովանդակ հայտարարություններ է արել, սակայն այդ ժամանակ իր նկատմամբ քրեական հետապնդում չի հարուցվել։
Միքայել արքեպիսկոպոս Աջապահյանի պաշտպանները նրա նկատմամբ քրեական հետապնդում հարուցելու մեջ քաղաքական դրդապատճառներ են տեսնում։ Նրանք հարց են բարձրացրել, թե ինչո՞ւ է 2024-ին արված հայտարարարության համար միայն 2025-ին հետապնդում հարուցվել՝ այն բանից հետո, երբ վարչապետը սկսել է թիրախավորել հոգևորականներին, այդ թվում՝ Աջապահյանին։
Վերաքննիչ դատարանում դատական ակտը բողոքարկել են և՛ պաշտպանները, և Դատախազությունը։
