Կրոնշտադտ քաղաքում (Սանկտ Պետերբուրգի մաս է կազմում) բացվել է Խորհրդային Միության նավատորմի ծովակալ Հովհաննես Ստեփանի Իսակովի հուշարձանը։
Բացումն իրականացրել են Ռուսաստանի Դաշնային խորհրդի համագործակցության գծով միջխորհրդարանական հանձնաժողովի համանախագահները, ՌԴ Դաշնային խորհրդի նախագահի տեղակալ Յուրի Վորոբյովը և ՀՀ Ազգային ժողովի փոխնախագահ Հակոբ Արշակյանը։
«Հայ ժողովրդի մեծ զավակ Իվան Ստեփանովիչ Իսակովը իր ողջ կյանքի ընթացքում հայրենիքին իսկական ծառայության, զինվորական և սպայական պարտքի օրինակ է ծառայել», – հայտարարել է Վորոբյովը։
Արշակյանն ընդգծել է, որ հայ ժողովրդի զավակի՝ խորհրդային հայտնի ծովակալի հուշարձանի բացումը երկու երկրների և ժողովուրդների ընդհանուր պատմության, ինչպես նաև ազատությունն ու խաղաղությունը պաշտպանողների հիշատակի նկատմամբ խորը հարգանքի խորհրդանիշ է։
Հանդիսավոր արարողությունը նվիրված էր Սանկտ Պետերբուրգում Արշակյանի և Վորոբյովի ղեկավարությամբ անցկացված ռուս-հայ խորհրդարանական խորհրդակցություններին։ Մասնակիցների թվում էին Դաշնության խորհրդի պաշտպանության և անվտանգության հարցերով կոմիտեի նախագահ Վլադիմիր Բուլավինը, Դաշնության խորհրդի սոցիալական քաղաքականության հարցերով կոմիտեի անդամ Անդրեյ Չեռնիշևը և Հայաստանի Ազգային ժողովի պատգամավորները (այդ թվում` «Քաղաքացիական պայմանագիր» խմբակցությունը և Հայաստանի ռուսական համայնքը ներկայացնող Ալեքսեյ Սանդիկովը – խմբ.):
Ռուսաստանին և Հայաստանին կապում են բարեկամության և համագործակցության ամուր պատմական կապեր։ Երկու երկրների միջև բազմակողմանի, փոխշահավետ համագործակցությունը, ընդհանուր պատմությունը, մշակույթը և արժեքները ռուս-հայկական գործընկերության ամուր հիմքն են, նշել է Յուրի Վորոբյովը։
«Մենք հետաքրքրված ենք ռուս-հայկական հարաբերությունները դաշնակցային ոգով զարգացնելու հարցում։ Համոզված ենք միջխորհրդարանական դիվանագիտության ներուժի մեջ։ Պատրաստ ենք հետագայում ևս ընդլայնել Դաշնության խորհրդի և Պետդումայի համապատասխան կոմիտեների միջև կապերը ՀՀ Ազգային ժողովի համապատասխան հանձնաժողովների գործընկերների հետ», – ընդգծել է Վորոբյովը։
Իր հերթին Արշակյանը նշել է, որ միջխորհրդարանական հանձնաժողովը մնում է երկխոսության և արդյունավետ աշխատանքի հիմնական հարթակը։ Հենց խորհրդարանները, որպես ժողովրդական ներկայացուցչության ինստիտուտներ, կարող են ամրացնել վստահությունը, քաղաքական երկխոսություն ապահովել ամենատարբեր ոլորտներում՝ տնտեսությունից և գիտությունից մինչև մշակույթ և մարդասիրական կապեր, ասել է ԱԺ փոխնախագահը։
Միջխորհրդարանական հանձնաժողովի հաջորդ նիստը կկայանա 2026 թվականին։
Sputnik Արմենիա
