Թուրք լրագրող Թուղչե Յըլմազը դատարանի առաջ է կանգնել Հայոց ցեղասպանությանն առնչվող հոդվածի պատրաստման համար։ Ինչպես հայտնում է «Ակոսը», «Թուրքահայ երիտասարդները պատմում են. 109 տարի շարունակվող սուգը» հոդվածի համար Յըլմազի դեմ գործ է հարուցվել Թուրքիայի Քրեական օրենսգրքի 301-րդ հոդվածով՝ պատվին և արժանապատվությանը հասցված վիրավորանքի համար։ Դեկտեմբերի 2-ին կայացել է դատական նիստը։ «Ակոսը» գրում է, որ դատական դահլիճը բազմամարդ է եղել։
Յըլմազն իր խոսքում նշել է, թե ինքը դատարանի առաջ է հայտնվել օրենքով երաշխավորված խոսքի ազատության իրավունքից որպես լրագրող օգտվելու համար։ Կարծում է, որ իր դեմ հաղորդում է ներկայացնողի շարժառիթը Հայոց ցեղասպանության թեման շոշափելն է եղել։ Նա ընդգծել է, որ սա լրագրողի մասնագիտության նկատմամբ ահաբեկում է։ Հիշեցրել է նաև, որ սա արվում է մի շրջանում, երբ խոսվում է Հայաստանի հետ հարաբերությունների խաղաղ կարգավորման, սահմանների բացման մասին։ Յըլմազն իր պաշտպանական խոսքում նաև Հրանտ Դինքին է հիշատակել, որին ևս տարիների առաջ դատում էին նույն հոդվածով՝ «թուրք ազգին վիրավորելու համար», հետո նաև սպանեցին։
Յըլմազի փաստաբանն իր պաշտպանական խոսքում ևս հիշատակել է Հրանտ Դինքի գործը, մասնավորապես՝ «Հրանտ Դինքն ընդդեմ Թուրքիայի» գործով ՄԻԵԴ վճիռը, որը Թուրքիայի կառավարությանը պարտավորեցրել էր 2010թ․ 133599 եվրո վճարել, քանի որ ըստ վճռի՝ Թուրքիայի իշխանությունը չի կատարել իր պարտականությունը լրագրող Հրանտ Դինքի կյանքի և խոսքի ազատության պաշտպանության հարցում։ Փաստաբանը նշել է, չի ցանկանում՝ Թուրքիան ստիպված լինի նոր գումարներ վճարել խախտված իրավունքների համար։
Դատարանը որոշում է կայացրել դատական նիստը շարունակել 2026թ․ ապրիլի 21-ին։
Sputnik Արմենիա
