ՀՀ քննչական կոմիտեն մանրամասնել է, թե ինչ գործի շրջանակում է ձերբակալվել, ապա՝ կալանավորվել Մայր Աթոռ Սուրբ Էջմիածնի դիվանապետ Արշակ արքեպիսկոպոս Խաչատրյանը (ավազանի անունը՝ Սամվել)։
Հայտնել էինք, որ դեկտեմբերի 4-ին ԱԱԾ-ն ձերբակալել էր սրբազանին ՀՀ քննչական կոմիտեի շենքից դուրս գալիս, որտեղ նա հարցաքննության էր գնացել: Ավելի ուշ հայտնի դարձավ , որ Արշակ արքեպիսկոպոս Խաչատրյանի նկատմամբ հանրային քրեական հետապնդում է հարուցվել մի խումբ անձանց կողմից նախնական համաձայնությամբ թմրամիջոց իրացնելու մեղադրանքով։
Ըստ տարածված հաղորդագրության՝ պարզվել է, որ Ս.Խ.-ի (Արշակ սրբազան-խմբ.) ցուցումով 2018 թվականի հուլիսի 7-ին դիվանատան քարտուղար Ս.Տ.-ն բջջային հեռախոսով լուսանկարել է դիվանատան ընդունարանում կախված՝ ակցիայի մասնակից Հ.Ա.-ին պատկանող ուսապայուսակը, ապա լուսանկարը «Վայբեր» հավելվածի միջոցով ուղարկել է Ս.Խ.-ին, ինչից հետո հանցավոր խմբի անդամները նշված ուսապայուսակի մեջ տեղադրել են «Մարիխուանա» տեսակի թմրամիջոցը՝ այդ կերպ հանդիսադիր վայրում՝ Հայ առաքելական եկեղեցու Մայր աթոռ սուրբ Էջմիածնի դիվանատան ընդունարանում Հ.Ա.-ին ապօրինի իրացնելով «Մարիխուանա» տեսակի թմրամիջոց։
Ապա Ս.Խ.-ի հրահանգով Ս.Տ.-ն իր հեռախոսահամարից զանգահարել է ՀՀ ոստիկանություն և հայտնել ակցիայի մասնակիցների մոտ կասկածելի իրերի հնարավոր առկայության մասին՝ միաժամանակ ոստիկանության աշխատակցին ուղարկելով իր կողմից արված լուսանկարը։
«Ոստիկանության ծառայողների կողմից կատարված զննությամբ Հ.Ա.-ի ուսապայուսակից հայտնաբերվել է վերջինիս ապօրինի իրացված՝ «Մարիխուանա» տեսակի թմրամիջոցը»,-նշված է հաղորդագրությունում։
ՀՀ քննչական կոմիտեն նաև պարզաբանել է, թե ինչու են անդրադարձել 2018 թվականի գործին։ Նշվում է, որ ՔԿ-ի նախագահի կողմից հիմնական մասնագիտական կառուցվածքային ստորաբաժանումների արդյունքներն ամփոփելու ժամանակ հանձնարարվել է վեր հանել, ուսումնասիրել և ակտիվ քննություն իրականացնել նախկին տարիներին կատարված և չբացահայտված քրեական վարույթներով:
Sputnik Արմենիա
