Գյումրիում զանգվածային անկարգություններ կատարելու դեպքի առթիվ նախաձեռնված քրեական վարույթի շրջանակում ձերբակալված 2 անձանցից մեկի նկատմամբ որպես խափանման միջոց է կիրառվել կալանքը, մյուսի նկատմամբ` տնային կալանքը, գրավը, պաշտոնավարման կասեցումը և բացակայելու արգելքը։ Այս մասին Sputnik Արմենիայի հետ զրույցում հայտնեցին Քննչական կոմիտեից։
Մեր տեղեկություններով՝ խափանման միջոց կալանք կիրառվել է քաղաքապետի խորհրդական Կարապետ Ղուկասյանի, իսկ տնային կալանքը՝ կոմունալ բաժնի պետ Արտյոմ Մկրտչյանի նկատմամբ։
Ավելի վաղ հայտնել էինք, որ Գյումրու քաղաքապետարանում զանգվածային անկարգություններ կատարելու դեպքի առթիվ նախաձեռնված քրեական վարույթի նախաքննության ընթացքում 4 անձի նկատմամբ հարուցվել է հանրային քրեական հետապնդում, որոնցից 2-ը ձերբակալվել են։
Sputnik Արմենիայի տեղեկություններով՝ գործով անցնող անձանցից մեկը Գյումրու քաղաքապետ Վարդան Ղուկասյանի որդին է՝ Սպարտակ Ղուկասյանը, որն արդեն կալանքի տակ է, մյուսը` փոխքաղաքապետ Ավետիս Առաքելյանը, որին իրավապահները բերման են ենթարկել, սակայն չեն ձերբակալել։ Ձերբակալվել էին կոմունալ բաժնի պետ Արտյոմ Մկրտչյանը և խորհրդական Կարապետ Ղուկասյանը։
