ՌԴ փոխարտգործնախարար Միխայիլ Գալուզինը և Ադրբեջանի փոխարտգործնախարար Սամիր Շարիֆովը քննարկել են տարածաշրջանային օրակարգը, ներառյալ Հայաստանի և Ադրբեջանի միջև հարաբերությունների կարգավորման գործընթացը և այդ ուղղությամբ Ռուսաստանի աջակցությունը: Տեղեկությունը հայտնում է ՌԴ ԱԳՆ–ն։
ՌԴ ԱԳՆ-ից նաև հայտնել են, որ կողմերը մտքեր են փոխանակել ԱՊՀ և եվրասիական տարածքում գործող այլ կառույցների շրջանակներում փոխգործակցության շուրջ:
Ռուսական կողմն առանձին շեշտադրել է այս ամռանը Բաքվում ձերբակալված 11 ՌԴ քաղաքացիների հնարավորինս արագ ազատ արձակման անհրաժեշտությունը:
Նշվում է, որ բանակցությունների զգալի մասը նվիրված է եղել երկկողմ օրակարգին:
«Հատուկ շեշտադրվել են երկկողմ օրակարգի արդիական հարցերն ու դրանց իրականացման ծրագրերը։ Ճշտվել է 2026 թվականի շփումների ժամանակացույցը, այդ թվում՝ ԱԳՆ խորհրդակցությունները։ Հաստատվել է քաղաքական երկխոսության հետագա համակողմանի ամրապնդման, առևտրատնտեսական և մշակութային-մարդասիրական համագործակցության ընդլայնման փոխադարձ տրամադրվածությունը՝ Դաշնակցային փոխգործակցության մասին հռչակագրի դրույթների համաձայն, որը ստորագրվել է երկու երկրների ղեկավարների կողմից 2022 թվականի փետրվարի 22-ին»,-ասված է հաղորդագրության մեջ։
Գերատեսչությունում նաև ընդգծել են «Կասպյան հնգյակի» ձևաչափով համագործակցության զարգացման կարևորությունը և երկու կողմերի արտահայտած շահագրգռվածությունը «3+3» տարածաշրջանային փոխգործակցության հարթակի ռիթմիկ աշխատանքը պահպանելու հարցում, որն ուղղված է տարածաշրջանի երկրների և նրանց անմիջական հարևանների ջանքերով Հարավային Կովկասի հարցերի լուծմանը:
Sputnik Արմենիա
