Երևանի քաղաքապետարանի 2025 թվականի բյուջեն 40 միլիարդ դրամով ավելի է եղել, քան 2024 թվականին, բայց արդյո՞ք որևէ մեկը նկատել է կտրուկ փոփոխություններ։ Այս մասին դեկտեմբերի 23-ին Երևանի ավագանու նիստում հայտարարել է «Մայր Հայաստան» խմբակցության ղեկավար Մանուկ Սուքիասյանը։
Նա կոչ է արել այն պաշտոնյաներին, ովքեր զվարճանքի միջոցառումների ժամանակ դուրս են գալիս տոնակատարությունների, քաղաք դուրս գալ նաև այն ժամանակ, երբ անձրևներ են գալիս կամ ձյուն է տեղում կամ մեքենաներ են խցանվում ճանապարհներին։
Սուքիասյանը մատնանշել է Էրեբունի պատմահնագիտական թանգարան-արգելոցի խայտառակ վիճակը՝ քաղաքային իշխանությունների կողմից կազմակերպված անվերջանալի ժամանցային միջոցառումների ֆոնին։
Ընդդիմադիրը Երևանի քաղաքապետ Տիգրան Ավինյանին հիշեցրել է այն մասին, որ հենց ինքն է հաշվետու Ավագանու անդամներին, այլ ոչ թե հակառակը՝ կոչ անելով վերջինիս հրաժարվել սպառնալիքներից։ «Ի՞նչ պիտի անեք։ Շատ-շատ ոստիկան կանչեք դահլիճից դուրս հանեք, մեկ էլ շատ-շատ բան անեք Ստեփանյան Գևորգի մեքենան վառեք (Ավագանու «Մայր Հայաստան» խմբակցության անդամ – խմբ.)։ Ի՞նչ եղավ էդ գործը։ Էդ որ էդ մեքենանա վառել եք ու մի հատ ինչ-որ դեռահասի եք բռնել որպես կատարող՝ երկու ամիս պահել եք ու բաց թողել», – նշել է Սուքիասյանը։
News.am
