Հզոր փոթորիկ է տեղի ունեցել Ստամբուլում, որն իր հետ բերել է ուժեղ քամի, բարձր ալիքներ և ծովային հաղորդակցության զանգվածային խափանումներ, այն տարածվել է նաև Թուրքիայի արևմտյան այլ նահանգներում։
Թուրքիայի պետական օդերևութաբանական ծառայության նախազգուշացումներից հետո փոթորկոտ քամին սկսել է ուժեղանալ առավոտյան ժամերին, հատկապես Բոսֆորի նեղուցում և Մարմարա ծովում։
Բեշիքթաշի շրջանում բարձր ալիքները դուրս են եկել ափային գիծ՝ վտանգավոր պայմաններ ստեղծելով։
Ծովային փոխադրումները փաստացի կաթվածահար են եղել. ծովում բարդ իրադրության պատճառով նավագնացությունն անհնար է դարձել։ Ուղևորատար հաղորդակցությունը Բեշիքթաշ-Քադըքյոյ գծում դադարեցվել է, իսկ մի շարք լաստանավային երթուղիներում հայտարարվել են չվերթների բազմաթիվ չեղարկումներ։
Բաքըրքյոյում ծառն ընկել է չորս ավտոմեքենաների վրա, ինչի պատճառով երթևեկության մի ուղղությունը ժամանակավորապես փակվել է։ Բահչելիէվլեր շրջանում մեկ այլ ծառ ընկել և վնասել է մի անցորդի, իշխանությունների տվյալներով՝ նա թեթև վնասվածքներ է ստացել։ Պաշտոնական տեղեկատվության համաձայն՝ քամու արագությունը առանձին շրջաններում գերազանցել է 70 կիլոմետր/ժամը։
Վատ եղանակ է նաև Մարմարա և Էգեյան ծովերի ավելի լայն տարածաշրջանում։ Չանաքկալե հյուսիսարևմտյան նահանգում ուժեղ քամին ստիպել է ժամանակավորապես դադարեցնել նավերի անցումը Դարդանելի նեղուցով, ինչպես նաև չեղարկվել են մի քանի լաստանավային չվերթներ։ Հարևան Էդիրնեի նահանգում հորդառատ անձրևները առաջացրել են տեղային հեղեղումներ։
Իզմիր արևմտյան քաղաքում ձկնորսները մնացել են նավահանգիստներում փոթորկոտ քամու պատճառով՝ զբաղվելով նորոգման աշխատանքներով և սպասելով եղանակային պայմաների բարելավման։ Փոթորիկը հասել է նաև Սև ծովի ափեր. Սամսունում ուժեղ քամին տապալել է ծառեր, որոնք փակել են ճանապարհները։
News.am
