ՀՀ ՊՆ-ն հասանելիություն չունի Սև լճի դիրքին, իսկ ադրբեջանական զինծառայողները չեն ստուգում հայ զինծառայողներին։ Տարեկան ամփոփիչ ասուլիսի ժամանակ այս հայտարարությունն արեց ՀՀ պաշտպանության նախարար Սուրեն Պապիկյանը՝ անդրադառնալով Սև լճի հատվածում տիրող իրավիճակին։
Նշենք, որ տեղեկություններ են շրջանառվում, թե ադրբեջանական զինծառայողները Սև լճի դիրքում ոտքից գլուխ ստուգում են հայ զինծառայողներին։
«Հերքում եմ, հերքում եմ և հերքում եմ այդ տեղեկությունը։ Դեռևս 2021 թվականի մայիսին ստեղծվել է մի իրավիճակ, խոսքը Սև լճի դիրքի մասին է, որին հասանելիություն չունենք։ Ընտրությունը հետևյալն է՝ կա՛մ պիտի թողնենք դիրքը, կա՛մ պիտի անցնենք ադրբեջանական դիրքի կողքով։ Սա նոր չէ, հստակ է, ու ես չեմ դրա հեղինակը և միակ շահառուն։ Դիրքը թողնելու պարագայում դուք ինձ մեղադրելու եք հայրենիքի ինչ-որ հատված զիջելու մեջ»,- նշեց Պապիկյանը։
Նրա խոսքով՝ այսօր հայ զինվորներն անցնում են ադրբեջանական դիրքի կողքով, այսպես կոչված «բլոկ պոստով»։
Եզրափակելով խոսքը՝ Պապիկյանը ևս մեկ անգամ վստահեցրեց՝ ադրբեջանական զինծառայողները հայ զինծառայողներին չեն ստուգում Սև լճի դիրքում։
Sputnik Արմենիա
