ԱՄՆ-ն այս պահին անհրաժեշտ ներուժ չունի Իրանի մոտակայքում նրա դեմ ռազմական գործողություն իրականացնելու համար, որը նա անում է ի պատասխան իշխանությունների կողմից երկրում զանգվածային բողոքի ակցիաների շարունակական ճնշմանը, գրում Է Politico-ն:
«Թրամփը հայտարարում է, որ Իրանի դեմ գործողությունների ռազմական բազմաթիվ տարբերակներ ունի: Իրականում դա այդպես չէ: Ընտրությունը շատ ավելի սահմանափակ է, քան նույնիսկ մեկ տարի առաջ», – նշում է պարբերականը:
Ամերիկյան զորքերը և նավերը, որոնք նախկինում նախագահի տրամադրության տակ էին այդ տարածաշրջանում, տեղափոխվել են Կարիբյան ավազան: Հակահրթիռային պաշտպանության համակարգերը, որոնք անցյալ տարի ուղարկվել էին Մերձավոր Արևելք, վերադարձվել են Հարավային Կորեա: Միևնույն ժամանակ, ԱՄՆ վարչակազմի ներկայացուցիչները հայտարարում են, որ խոշոր ռազմական ակտիվների վերատեղաբաշխման պլաններ չկան, ասվում է հոդվածում:
Պարբերականի տեղեկություններով՝ հատկապես սուր է հակաօդային պաշտպանության միջոցների պակասի խնդիրը, որոնք պաշտպանում են ամերիկյան զորքերը իրանական զենքի հասանելիության գոտում։ Եթե վարչակազմը հարված հասցնի և իրանցիները պատասխանեն ուժով, ԱՄՆ-ն չափազանց քիչ որսիչ հրթիռներ կունենա՝ ամերիկյան զորքերը Թեհրանի հրթիռներից պաշտպանելու համար։ Պենտագոնն 10 հազար զինծառայող ունի Կատարի «Ալ-Ուդեյդ» ավիաբազայում և ավելի փոքր զորակազմեր Իրաքում, Սիրիայում ու Հորդանանում։
Նախագահը դեռևս կարող է հրաման տալ ավիահարվածներ հասցնել Իրանի ղեկավարությանը կամ ռազմական օբյեկտներին։ Սակայն նրա հնարավորություններն էլ ավելի սահմանափակ են, քան հունիսին, երբ ԱՄՆ-ն հարվածել է իրանական միջուկային օբյեկտներին։ Բացի այդ, Թրամփը ստիպված է հաշվի նստել օրենսդիրների հետ, որոնք Վենեսուելայի առաջնորդ Նիկոլաս Մադուրոյին ձերբակալելու հրամանից ընդամենը մեկ շաբաթ անց հարց են բարձրացնում՝ արդյոք նման հարվածը ԱՄՆ-ին չի ներքաշի տարածաշրջանային ևս մեկ պատերազմի մեջ, ընդգծում է Politico-ն:
News.am
