Կանադայի իշխանությունները Չինաստանի հետ ազատ առևտրի համաձայնագիր չեն կնքի: Այս մասին հայտնել է երկրի վարչապետ Մարկ Քարնին։
«Մենք նման մտադրություններ չունենք Չինաստանի կամ որևէ այլ ոչ շուկայական տնտեսության հետ կապված»,- Քարնիի խոսքերը լրագրողների համար մեջբերել է The Globe and Mail թերթը։ Վարչապետը բացատրել է, որ Օտտավայի այս պարտավորությունները նշված են Կանադայի, Մեքսիկայի և Միացյալ Նահանգների միջև կնքված եռակողմ առևտրային համաձայնագրում։
ԱՄՆ նախագահ Դոնալդ Թրամփը ավելի վաղ հայտնել էր, որ Վաշինգտոնը 100 տոկոս մաքսատուրք կսահմանի Միացյալ Նահանգներ առաքվող կանադական բոլոր ապրանքների վրա, եթե գործարքը կնքվի։ Քարնին, որին Թրամփը սոցիալական ցանցերում այդ գրառման մեջ անվանել էր «նահանգապետ», արձագանքել է։ Նա նշել է, որ «[Կանադայի] տնտեսության առջև ծառացած արտաքին սպառնալիքի առջև կանադացիները ընտրություն են կատարել՝ կենտրոնանալ այն բանի վրա, ինչը [իրենք] կարող են վերահսկել»։ «Մենք չենք կարող վերահսկել, թե ինչ են անում մյուս երկրները։ Բայց մենք կարող ենք լինել մեր սեփական լավագույն հաճախորդը. գնեք կանադականը, կառուցեք կանադականը։ Միասին մենք կկառուցենք ուժեղ Կանադա»,- գրել է վարչապետը։ Կանադայի միջկառավարական հարաբերությունների նախարար և Միացյալ Նահանգների հետ առևտրի պատասխանատու Դոմինիկ Լեբլանը հայտարարության մեջ նշել է, որ Կանադան «չի ձգտում ազատ առևտրի համաձայնագրի կնքել Չինաստանի հետ»։ Նա ասել է, որ երկու կողմերը պարզապես «համաձայնության են եկել սակագների հետ կապված մի քանի վիճելի հարցերի շուրջ»։
Հունվարին Կանադան և Չինաստանը հայտարարել են տնտեսական ոլորտում «ռազմավարական գործընկերության» մասին։ Ըստ The Globe and Mail-ի՝ Չինաստան կատարած այցի ժամանակ Կանադայի վարչապետը երկիրն անվանել է ավելի կանխատեսելի առևտրային գործընկեր, քան Միացյալ Նահանգները։ Համաձայնագրի շրջանակում Քարնին թույլ է տվել մոտ 50 հազար չինական էլեկտրական մեքենաների մուտքը Կանադա՝ ցածր սակագնային դրույքաչափով։ Նախկինում Կանադան 100 տոկոս սակագին էր սահմանել չինական մեքենաների վրա, որը Օտտավան, Միացյալ Նահանգների հետ միասին, սահմանել էր 2024թ․ նախագահ Ջո Բայդենի օրոք։ Կանադայի սակագների մեղմացմանն ի պատասխան՝ Չինաստանը նվազեցրել է ռապսի սերմերի վրա դրված մաքսատուրքերը։ Չինաստանի առևտրի նախարարությունը հայտնել է, որ Պեկինը և Օտտավան համաձայնության են եկել փոխադարձ առևտրային վեճերը լուծելու հարցում և համաձայնել են ընդլայնել տնտեսական փոխգործակցությունը։
News.am
