ՌԴ ԱԳ նախարար Սերգեյ Լավրովը հանդիպել է ԱՊՀ անդամ երկրների դեսպանների հետ: ԱԳՆ-ի փոխանցմամբ՝ քննարկվել է միջազգային օրակարգը, ամփոփվել են 2025 թվականին համագործակցության արդյունքները։
«Հանդիպման մասնակիցները մտքեր են փոխանակել միջազգային արդիական թեմաների շուրջ, ամփոփել 2025 թվականին Եվրասիական ինտեգրացիոն միավորումների շրջանակներում բազմակողմ համագործակցության արդյունքները։ Նախանշվել են առաջիկա հեռանկարների խնդիրները, այդ թվում արտաքին քաղաքականության համակարգման ամրապնդումը, փոխգործակցության ավելացումը առևտրատնտեսական, մշակութային-մարդասիրական և տարածաշրջանային անվտանգության ապահովման ոլորտներում», – ասված է հաղորդագրության մեջ:
Հանդիպմանը մասնակցել է նաև Ռուսաստանում Հայաստանի դեսպան Գուրգեն Արսենյանը:
Անկախ պետությունների համագործակցությունը (ԱՊՀ) ստեղծվել է 1991 թվականի դեկտեմբերին ԽՍՀՄ փլուզումից հետո՝ որպես նախկին միութենական հանրապետությունների միջև համագործակցության հարթակ։ Միավորման նպատակն է քաղաքական, տնտեսական, մարդասիրական և մշակութային ոլորտներում փոխգործակցության համակարգումը, ինչպես նաև հետխորհրդային տարածքում կայունության և անվտանգության ապահովումը:
Ներկայում ԱՊՀ-ին անդամակցում են Ռուսաստանը, Հայաստանը, Ադրբեջանը, Բելառուսը, Ղազախստանը, Ղրղզստանը, Տաջիկստանը և Ուզբեկստանը: Մոլդովան և Թուրքմենստանը համագործակցում են առանձին ձևաչափերով, Ուկրաինան փաստացի դադարեցրել է մասնակցությունը միավորման աշխատանքներին։
Sputnik Արմենիա
