Իսրայելի պաշտպանության ուժերի (IDF) շտաբի պետ Էյալ Զամիրը շաբաթավերջին գաղտնի այցով մեկնել է Միացյալ Նահանգներ՝ Իրանի դեմ հնարավոր գործողությունները քննարկելու համար, հայտնել է The Jerusalem Post-ը։
Նրա խոսքով՝ Զամիրը Վաշինգտոնում ԱՄՆ պաշտպանության քարտուղարության բարձրաստիճան պաշտոնյաների հետ հանդիպումների ժամանակ ներկայացրել է գաղտնի հետախուզական տվյալներ, քննարկել է Իրանի դեմ ռազմական տարբերակներ և փորձել է ազդել ԱՄՆ նախագահ Դոնալդ Թրամփի վարչակազմի և Թեհրանի միջև դիվանագիտական բանակցությունների վրա։
Այցի ընթացքում Իսրայելի պաշտպանության բանակի շտաբի պետը զեկուցել է վերջին հետախուզական տվյալների մասին, որոնք վկայում են Իրանի ռազմական կարողությունների վերականգնման, մասնավորապես՝ բալիստիկ հրթիռների արտադրության ավելացման առաջընթացի մասին։
Լրատվամիջոցի տվյալներով՝ Իսրայելը մտահոգված է, որ Թրամփի վարչակազմը կարող է համաձայնության գալ Թեհրանի հետ՝ ուրանի հարստացումը սառեցնելու վերաբերյալ՝ առանց բալիստիկ հրթիռների հարցը լիովին լուծելու։ Ըստ The Jerusalem Post-ի՝ Վաշինգտոնում Զամիրը նաև ընդգծել է ԱՄՆ-ի կողմից Իրանի հետ մոտ 400 կգ հարստացված ուրան պահելու հնարավոր համաձայնության հետ կապված վտանգը։
Իրանի շուրջ իրավիճակը սրվել էր 2025 թվականի դեկտեմբերի վերջին՝ երկրում սկսված բողոքի ցույցերից հետո։ ԱՄՆ նախագահը բազմիցս հայտարարել է Իրանի դեմ ուժի կիրառման հնարավորության մասին՝ բողոքի ակցիաները կոշտ ճնշելու շարունակության դեպքում։
Հունվարին ԱՄՆ-ն հայտարարել էր Մերձավոր Արևելքում ռազմական զորավարժությունների անցկացման մասին և տարածաշրջան էր ուղարկել ավիակիրային հարվածային խումբ՝ USS Abraham Lincoln ավիակրի գլխավորությամբ։ Իրանի գերագույն առաջնորդ Ալի Խամենեին փետրվարի 1-ին հայտարարել էր, որ ԱՄՆ-ի կողմից Իրանի վրա հարձակման դեպքում պատերազմը կվերաճի տարածաշրջանային հակամարտության։
Armenia Today
