Շանհայի համագործակցության կազմակերպության (ՇՀԿ) երկրների համատեղ զորավարժությունների վերաբերյալ Արևմուտքի մտավախությունները հիմնազուրկ են։ Այս մասին ՌԻԱ Նովոստիին հայտնել է ՇՀԿ գլխավոր քարտուղար Նուրլան Երմեկբաևը։
«Վերոհիշյալ մտավախությունները, մեր կարծիքով, հիմք չունեն, քանի որ ՇՀԿ գործունեությունը կրում է ոչ առճակատման բնույթ և ուղղված չէ երրորդ երկրների ու միջազգային կազմակերպությունների դեմ», – հայտարարել է Երմեկբաևը:
Նա հայտնել է, որ ՇՀԿ անդամ պետությունները սերտ կապի մեջ են 2026 թվականին համատեղ զորավարժությունների անցկացման ժամանակացույցի համաձայնեցման հասնելու համար ինչպես զինվորականների, այնպես էլ ՇՀԿ տարածաշրջանային հակաահաբեկչական կառույցի գծով:
Երմեկբաևը հիշեցրել է, որ կազմակերպության բոլոր անդամ պետությունների մասնակցությամբ 2025 թվականի դեկտեմբերին Իրանում անցկացվել են «Սահանդ-2025» համատեղ հակաահաբեկչական զորավարժությունները։ Երկրորդ փուլին հրավիրվել են մասնակցելու նաև այլ երկրներ՝ կառույցի գործընկերներ Ադրբեջանը և Սաուդյան Արաբիան, Իրանի հարևան պետությունները՝ Իրաքը և Օմանը, ինչպես նաև միջազգային կազմակերպությունների՝ ՀԱՊԿ-ի, ԱՊՀ Հակաահաբեկչական կենտրոնի, ԱՊՀ սահմանապահ զորքերի հրամանատարների խորհրդի համակարգող ծառայության ներկայացուցիչներ:
ՇՀԿ-ն միջազգային կազմակերպություն է, որը հիմնադրվել է 2001 թվականին: Այն ներառում է Բելառուսը, Հնդկաստանը, Իրանը, Ղազախստանը, Չինաստանը, Ղրղզստանը, Ռուսաստանը, Տաջիկստանը, Պակիստանը և Ուզբեկստանը: Միավորման գործընկեր երկրներն են՝ Աֆղանստանը, Հայաստանը, Ադրբեջանը, Բահրեյնը, Եգիպտոսը, Կամբոջան, Կատարը, Քուվեյթը, Լաոսը, Մալդիվները, Մոնղոլիան, Մյանման, Նեպալը, Արաբական Միացյալ Էմիրությունները, Սաուդյան Արաբիան, Թուրքիան և Շրի Լանկան:
Sputnik Արմենիա
