Իրանի արտաքին գործերի նախարար Աբաս Արաղչին Օմանում ԱՄՆ-ի հետ բանակցություններն անվանել է «լավ մեկնարկ»։ Այս մասին նա հայտարարել է իրանական հեռուստատեսության եթերում։
Այսօր՝ փետրվարի 6-ին, Օմանի մայրաքաղաք Մասկատում ԱՄՆ-ի և Իրանի պատվիրակությունների միջև բանակցություններ են կայացել, որոնց նպատակն է հարթել կողմերի միջև առկա տարաձայնությունները իրանական միջուկային ծրագրի վերաբերյալ։
Նրա խոսքով՝ Իրանն ու ԱՄՆ-ն պայմանավորվել են շարունակել բանակցությունները, սակայն նախևառաջ խորհրդակցություններ կանցկացնեն իրենց երկրներում։
«Ընդհանուր առմամբ, սա (բանակցությունները- խմբ․) լավ մեկնարկ էր, սակայն դրանց շարունակությունը կախված է խորհրդակցություններից, որոնք կանցկացվեն մայրաքաղաքներում։ Հանգամանքների վերաբերյալ որոշումը կկայացվի ավելի ուշ»,-ասել է նա։
Իրանի ԱԳՆ ղեկավարն ընդգծել է, որ Թեհրանն անհրաժեշտ է համարում հաղթահարել ԱՄՆ-ի նկատմամբ առաջացած անվստահությունը, սակայն Վաշինգտոնի հետ բանակցային շրջանակների մշակումը հնարավոր է։
«Այդ անվստահությունը մարտահրավեր է բանակցությունների համար, մենք պետք է հաղթահարենք այն, որպեսզի մշակենք նոր բանակցությունների շրջանակները»,-ասել է Արաղչին։
Նախարարի խոսքով՝ եթե ներկայիս դիվանագիտական գործընթացը շարունակվի, կողմերը կկարողանան հաջորդ փուլի ընթացքում մշակել երկխոսության անհրաժեշտ շրջանակները։
Կողմերի հանդիպումը առաջինն էր բանակցային գործընթացում ամիսներ տևած դադարից հետո, որն առաջացել էր 2025 թվականի հունիսին իրանա-իսրայելական հակամարտության պատճառով (մինչ այդ պահը Իրանն ու ԱՄՆ-ն խորհրդակցությունների հինգ փուլ էին անցկացրել):
Sputnik Արմենիա
