Ամերիկայի Հայ Դատի հանձնախումբն (ANCA) ակտիվացրել է իր քարոզարշավը՝ ԱՄՆ փոխնախագահ Ջեյ Դի Վենսի Հայաստան և Ադրբեջան կատարելիք այցից առաջ։ Կազմակերպությունը կոչ է արել Վենսին հանդիպել Բաքվում անօրինական պահվող հայ պատանդների հետ և հրապարակավ պահանջել նրանց անհապաղ ազատ արձակումը։
Բացի այդ, ANCA-ն պնդում է աջակցել էթնիկ տեղահանված հայ փախստականների՝ իրենց հայրենի Արցախ անվտանգ վերադառնալու իրավունքին, պահանջում է, որ Ադրբեջանը դուրս բերի զորքերը հայկական տարածքից և դադարեցնի հազարամյակների պատմություն ունեցող հայկական քրիստոնեական հուշարձանների ոչնչացումը։
«Փոխնախագահ Վենսի այցը նշանավորում է ամերիկյան դիվանագիտության ամենաբարձր մակարդակը Հայաստանում, և այն մեծ ուշադրության է արժանանում՝ ԱՄՆ ուժեղ ղեկավարությունից սպասումների պատճառով։ Իրական խաղաղությունը չի կարող կառուցվել էթնիկ զտումների, պատանդներ պահելու և մշակութային ժառանգության ոչնչացման ֆոնին։ ԱՄՆ-ն պետք է հստակեցնի, որ հայ ժողովրդի կողքին է»,- ասել է ANCA-ի գործադիր տնօրեն Արամ Համբարյանը։
Միացյալ Նահանգները նաև դատապարտել է Ադրբեջանում արցախցի առաջնորդների նկատմամբ կայացված դատավճիռները՝ Աբու Դաբիում Հայաստանի վարչապետ Նիկոլ Փաշինյանին և Ադրբեջանի նախագահ Իլհամ Ալիևին՝ «Զայեդ» մարդկության խաղաղության մրցանակը հանձնելուց մեկ օր անց։
«Վրդովված ենք արցախցի հայ պատանդների համար ցմահ ազատազրկման անարդար դատավճռից. նրանք պետք է անհապաղ ազատ արձակվեն»,- ասել է ԱՄՆ կոնգրեսական Ֆրենկ Փալոնեն։
ANCA-ն նաև Վենսին կոչ է արել հանդիպել վերջերս ազատ արձակված պատանդների, նրանց փաստաբանների և դեռևս կալանքի տակ գտնվողների ընտանիքների, ինչպես նաև Արցախի ներքին տեղահանված բնակչության ներկայացուցիչների հետ և հրապարակայնորեն աջակցել նրանց անվտանգ տուն վերադառնալու իրավունքին։
Փետրվարի 6-ին հայկական բարեգործական կազմակերպությունները դիմել էին Վենսին՝ Բաքվում պահվող գերիների ազատ արձակմանն աջակցելու համար։ Բաքվում պահվող հայ գերիներին ազատ արձակելու հարցով Վենսին դիմել էին նաև Մեծի Տանն կաթողիկոս Արամ Ա-ն, «Միասնության թևեր» նախաձեռնության ղեկավար Արման Թաթոյանը, երկու տասնյակից ավելի իրավապաշտպան և մարդու իրավունքների հարցերով զբաղվող հայաստանյան հասարակական կազմակերպություններ։ Ֆրանսիայի Ազգային ժողովը միաձայն ընդունել էր բանաձև, որով պահանջում է Ադրբեջանում պահվող Արցախի ռազմաքաղաքական ղեկավարության ներկայացուցիչների, ինչպես նաև բոլոր հայ ռազմագերիների անհապաղ և անվերապահ ազատումը։
Վենսը Երևան է ժամանելու փետրվարի 9-ին, իսկ հաջորդ օրը մեկնելու է Բաքու։ ԱՄՆ նախագահ Դոնալդ Թրամփը հունվարի 24-ին հայտնել էր, որ Վենսը փետրվարին կայցելի Հայաստան և Ադրբեջան՝ խաղաղության նախաձեռնություններն ամրապնդելու և TRIPP («Թրամփի ուղի հանուն միջազգային խաղաղության և բարգավաճման») նախագիծն առաջ մղելու համար։
Armenia Today
