Հայաստանը ներկայացնող գեղասահորդուհի Կարինա Ակոպովան մեկնաբանել է մասնակցությունը Միլանում անցկացվող ձմեռային Օլիմպիական խաղերի ծրագրով գեղասահքի մրցման որակավորման փուլին Արա Գևորգյանի հեղինակած «Արցախ» ստեղծագործության համանուն ծրագրով։
«Տպավորությունները գերազանց են։ Ուրախ ենք, որ կարողացանք այս ստեղծագործությամբ հանդես գալ»,- ասել է Կարիան Ակոպովան NEWS.am Sport-ի թղթակցի հետ զրույցում։
Կարինա Ակոպովա – Նիկիտա Ռախմանին սպորտային զույգը գրավեց 12-րդ տեղը և հաղթահարեց որակավորման փուլի արգելքը: Առաջին անգամ Օլիմպիական խաղերին մասնակցող և Հայաստանը ներկայացնող սպորտային զույգն ապահովեց մասնակցությունը փետրվարի 16-ին անցկացվելիք ազատ ծրագրին:
Օլիմպիական խաղերի կարճ ծրագրում որակավորման փուլը հաղթահարեց լավագույն 16 զույգը:
Հիշեցնենք, որ Ադրբեջանը ՄՕԿ-ին բողոք էր ներկայացրել Հայաստանի օլիմպիական զույգի կարճ ծրագրի «Արցախ» անվան վերաբերյալ: Միջազգային օլիմպիական կոմիտեն բավարարել էր բողոքը և փոխել ծրագրի անունը պաշտոնական ցանկում, նշելով՝ Արա Գևորգյանի ստեղծագործություն:
Չնայած Ադրբեջանի ջանքերին, «Արցախ» ստեղծագործությունը Միլանի Ice Skating Arena-ում հնչեց, բայց ներկայացվեց որպես «Արա Գևորգյանի ստեղծագործություն»:
