Բաքվում աշխարհահռչակ գործարար և բարերար, Լեռնային Ղարաբաղի Հանրապետության նախկին պետնախարար Ռուբեն Վարդանյանի նկատմամբ կայացված ապօրինի դատավճիռն անվանել են «հակամարտության տրամաբանական ավարտ»։
«Ռուբեն Վարդանյանի գործով Բաքվի դատարանի որոշումը դիտարկվում է ոչ միայն որպես արդարության վերականգնում, այլև որպես գրեթե 30-ամյա հակամարտության խորհրդանշական և տրամաբանական ավարտ, որն ադրբեջանցի ժողովրդին մեծ տառապանքներ է պատճառել», – սոցիալական հարթակի իր էջում գրել է Ադրբեջանի նախագահի օգնական Հիքմեթ Հաջիևը, փոխանցում է APA-ն:
Հիշեցնենք, որ Ռուբեն Վարդանյանն ապօրինաբար դատապարտվել է 20 տարվա ազատազրկման։ Ադրբեջանական գերության մեջ գտնվող ԼՂՀ մյուս նախկին ղեկավարները դատապարտվել են ցմահ ազատազրկման կամ 20 տարվա բանտարկության։
«30-ամյա հակամարտությունը, որն ադրբեջանցի ժողովրդին մեծ տառապանքներ է պատճառել», սանձազերծվել է Բաքվի կողմից՝ ի պատասխան Լեռնային Ղարաբաղի ժողովրդի ինքնորոշման ձգտման խաղաղ որոշման։ 2020 թվականի աշնանը Ադրբեջանը՝ Թուրքիայի աջակցությամբ և սիրիացի գրոհայինների ներգրավմամբ, օկուպացրել է Լեռնային Ղարաբաղի մի մասը։ 2023 թվականի սեպտեմբերին Ադրբեջանն ամբողջությամբ օկուպացրել Արցախը՝ ստիպելով 150-հազարանոց հայ բնակչությանը բնաջնջման սպառնալիքի տակ լքել հայրենի օջախները։
News.am
