S&P Global Ratings-ը հինգշաբթի օրը վերանայել է Հայաստանի կանխատեսումը՝ «կայուն»-ից դարձնելով «դրական», և վերահաստատել է երկրի արտարժույթով ու ազգային արժույթով սուվերեն վարկանիշները երկարաժամկետ և կարճաժամկետ պարտավորությունների գծով «BB-/B» մակարդակում։
Կանխատեսման վերանայումն արտացոլում է տարածաշրջանային աշխարհաքաղաքական և անվտանգային իրավիճակի հնարավոր բարելավումը, մասնավորապես՝ Հայաստանի և Ադրբեջանի միջև դիվանագիտական ու առևտրային հարաբերությունների կարգավորման ուղղությամբ հետագա առաջընթացը։ S&P-ն նաև բարենպաստ է գնահատում Հայաստանի տնտեսական աճի հեռանկարները՝ նշելով, որ ՀՀ Կենտրոնական բանկի միջազգային պահուստների ավելի բարձր մակարդակը և լողացող փոխարժեքը կօգնեն մեղմել հնարավոր անկանխատեսելի արտաքին ցնցումները։
S&P-ն կանխատեսում է, որ Հայաստանի իրական ՀՆԱ-ն այս տարի կաճի 5,3%-ով, իսկ 2027 թվականին՝ 4,8%-ով։ 2022–2025 թվականներին Հայաստանի տնտեսության միջին տարեկան աճը կազմել է 7,8%, ինչն ամենաբարձր ցուցանիշներից մեկն է գործակալության կողմից վարկանիշավորվող 143 սուվերեն պետությունների շարքում։ Հայաստանի և Ադրբեջանի միջև խաղաղության բանակցություններն առաջ են շարժվել, ինչը նվազեցնում է կարճաժամկետ հեռանկարում հետագա ռազմական էսկալացիայի հավանականությունը։ 2025 թվականի օգոստոսին Ամերիկայի Միացյալ Նահանգների միջնորդությամբ ձեռք բերված համաձայնությունը դարձել է կարևոր քաղաքական հանգրվան՝ ցույց տալով հանձնառությունը ղեկավարության մակարդակով և նպաստելով անվտանգության ոլորտում իրավիճակի կայունացմանը։
S&P-ն կանխատեսում է, որ բյուջեի դեֆիցիտը 2026–2029 թվականներին միջինում կկազմի ՀՆԱ-ի մոտ 3,3%-ը։ Գործակալության գնահատմամբ՝ պետական համախմբված բյուջեի դեֆիցիտը 2026 թվականին կկազմի ՀՆԱ-ի 4,2%-ը, ինչն ավելի ցածր է պաշտոնական թիրախից (մոտ 4,5%): Պետական զուտ պարտքը (առանց իրացվելի ակտիվների), ըստ S&P-ի կանխատեսումների, միջնաժամկետ հեռանկարում ընդհանուր առմամբ կմնա կայուն՝ ՀՆԱ-ի մոտ 44% չափավոր մակարդակում։
Հայաստանի միջազգային պահուստները զգալիորեն ամրապնդվել են 2025 թվականին. համախառն միջազգային պահուստները հունվարին հասել են ռեկորդային 5,2 մլրդ դոլարի՝ նախորդ տարվա մոտ 3,3 մլրդ դոլարի համեմատ։ Բանկային հատվածը շարունակում է մնալ լավ կապիտալացված և բարձր շահութաբեր՝ շնորհիվ զուտ տոկոսային եկամտի ամուր ցուցանիշների, ընդ որում՝ վարկավորման աճի տեմպերը տարեկան կտրվածքով գերազանցում են 20%-ը։
News.am
