Հայաստանը պաշտոնապես հայտ է ներկայացրել Խաղաղության եվրոպական գործիքի շրջանակներում ֆինանսական աջակցության երրորդ փաթեթը ստանալու նպատակով: Այս մասին հայտարարել է երկրի արտաքին քաղաքական գերատեսչության ղեկավարը՝ ընդգծելով պաշտպանության, անվտանգության և վիզաների ազատականացման ոլորտներում Բրյուսելի հետ գործընկերության աննախադեպ ընդլայնումը:
Մարտի 23-ին Ազգային ժողովի արտաքին հարաբերությունների մշտական հանձնաժողովի նիստում ելույթ ունենալիս արտաքին գործերի նախարար Արարատ Միրզոյանը հայտնեց 20 միլիոն եվրո արժողությամբ եվրոպական օգնության երկրորդ տրանշի հաջող ստացման մասին։ Այս որոշումը Եվրամիության կողմից վերջնականապես հաստատվել էր ընթացիկ տարվա հունվարին՝ տևական դիվանագիտական փակուղին և Հունգարիայի վետոն հաղթահարելուց հետո:
Հիշեցնենք, որ 10 միլիոն եվրո արժողությամբ աջակցության առաջին փաթեթը Երևանը ստացել էր 2024 թվականին: Այժմ արդեն հայկական կառավարությունը նախաձեռնել է երրորդ փաթեթի տրամադրման գործընթացը։
Եվրոպացի գործընկերների կողմից հատկացվող միջոցները նպատակաուղղվում են Հայաստանի Զինված ուժերի լոգիստիկ կարողությունների արդիականացմանը՝ հատուկ շեշտադրում անելով ճգնաժամային իրավիճակներում քաղաքացիական բնակչության պաշտպանության վրա։ Ծրագիրը կոչված է նաև բարձրացնել երկրի ընդհանուր դիմակայունությունը և արագացնել հայկական ստորաբաժանումների փոխգործակցելիության գործընթացը՝ ԵՄ հովանու ներքո միջազգային խաղաղապահ առաքելություններին նրանց հնարավոր մասնակցության համար։
Ինչպես ընդգծեց նախարարը, ճգնաժամային կառավարման վերաբերյալ վերջերս ուժի մեջ մտած համաձայնագիրը թույլ է տալիս Հայաստանին սեփական հայեցողությամբ միանալ եվրոպական տարբեր քաղաքացիական առաքելություններին:
Բացի պաշտպանական վեկտորից, դիվանագիտական գերատեսչության ղեկավարը նշեց նաև երկկողմ երկխոսության հումանիտար հարթությունում առկա էական առաջընթացի մասին։ Խոսքը, մասնավորապես, վիզաների ազատականացման գործընթացի մասին է: Ըստ Միրզոյանի՝ Բրյուսելը բավականին օպերատիվ կերպով հայկական կողմին է փոխանցել վիզային ռեժիմի վերացման համար անհրաժեշտ գործողությունների պաշտոնական պլանը, ինչը նոր էջ է բացում Երևանի և Եվրամիության միջև ինտեգրացիոն գործընթացներում:
Verelq.am
