Կապան կատարած այցի ընթացքում ՀՀ-ում Իրանի դեսպան Խալիլ Շիրգոլամին հանդիպել է Սյունիքի մարզպետ Ռոբերտ Ղուկասյանի հետ։
ՀՀ-ում Իրանի դեսպանատան մամուլի ծառայության հաղորդմամբ՝ Շիրգոլամին ընդգծել է Սյունիքի ռազմավարական նշանակությունը՝ որպես Իրանից Հայաստան և Հայաստանից Իրան դարպաս, Սյունիքը բնութագրելով որպես կայուն, զարգացած և բարգավաճ տարածաշրջան, որը համապատասխանում է Իրանի Իսլամական Հանրապետության ռազմավարությանը։
Կողմերը քննարկել են նաև տնտեսական, մշակութային և գիտական համագործակցության, ինչպես նաև հումանիտար կապերի զարգացմանն ուղղված ծրագրերն ու նախաձեռնությունները։ Նրանք նաև անդրադարձել են Իրանի քաղաքների և Սյունիքի մարզի միջև քույր քաղաքների հարաբերություններ հաստատելու ծրագրերին և համաձայնության են եկել դրանց խթանման և իրականացման վերաբերյալ։
Այցի ընթացքում Շիրգոլամին այցելել է նաև Նորավան ենթակայան, որը Հայաստանի և Իրանի միջև էլեկտրահաղորդման երրորդ գծի նախագծի մաս է կազմում։
Այցի ընթացքում Իրանի դեսպանը ծանոթացել է նախագծի վրա իրականացվող աշխատանքներին, ձեռք բերված առաջընթացին և դրա իրականացման նոր փուլին։ Գովաբանելով պատասխանատուների ջանքերը՝ նա ընդգծեց նախագծի իրականացումը արագացնելու անհրաժեշտությունը և կոչ արեց պատասխանատուներին ավելի մեծ ջանքեր գործադրել այն ժամանակին ավարտելու համար։
Ենթակայանը Իրանի և Հայաստանի միջև 400 կՎ լարման էլեկտրահաղորդման գծի կառուցման նախագծի մի մասն է՝ 1100 մեգավատ հզորությամբ։ Էլեկտրահաղորդման գիծը սկսվում է Իրանի սահմանից՝ Նորդուզի շրջանում, և ձգվում է մինչև Հայաստանի մայրաքաղաք Երևան։ 270 կիլոմետր երկարությամբ էլեկտրահաղորդման գիծը ներառում է էլեկտրահաղորդման գծերի և դրանց հետ կապված ենթակայանների կառուցումը, այդ թվում՝ Նորավանի ենթակայանը։
Արմինֆո
