ԵՄ-ն պաշտոնապես հրապարակել է Ռուսաստանի դեմ պատժամիջոցների 8-րդ փաթեթը
ԵՄ-ն պաշտոնապես հրապարակել է Ռուսաստանի դեմ պատժամիջոցների 8-րդ փաթեթը, որը սահմանում է ԵՄ ներմուծման 7 միլիարդ եվրոյի նոր արգելքներ, ինչպես նաև արտահանման սահմանափակումներ: Պատժամիջոցները նաև «ռուսական բանակին և նրա մատակարարներին զրկում են լրացուցիչ հատուկ ապրանքներից և սարքավորումներից, որոնք անհրաժեշտ են Ուկրաինայի տարածքում պատերազմ մղելու համար»։
Մասնավորապես, այս փաթեթը պարունակում է հետևյալ կետերը՝
Արտահանման լրացուցիչ սահմանափակումներ՝ ուղղված ռազմական, արդյունաբերական և տեխնոլոգիական ապրանքների հասանելիության նվազեցմանը։
Ածխի արտահանման արգելքը, ներառյալ կոքսային ածուխը (որն օգտագործվում է ռուսական արդյունաբերական ձեռնարկություններում), ավիացիոն արդյունաբերության մեջ օգտագործվող տեխնիկական արտադրանքի և որոշ քիմիական նյութերի արգելք։
Հրազենի և այլ ապրանքների արտահանման արգելք։
Համաձայնեցվել են ներմուծման լրացուցիչ սահմանափակումներ՝ գրեթե 7 միլիարդ եվրոյի չափով։
Դրանք ներառում են պատրաստի արտադրանքի և պողպատից պատրաստված կիսաֆաբրիկատների, մեքենաների և սարքավորումների, պլաստմասի, տրանսպորտային միջոցների, տեքստիլի, կոշկեղենի, կաշվի, կերամիկայի ներմուծման արգելք։
Փաթեթը նշանավորում է ԵՄ-ի շրջանակներում ռուսական նավթի արտահանման վերաբերյալ G7-ի համաձայնագրի իրագործման սկիզբը։
Նոր փաթեթն արգելում է ԵՄ քաղաքացիներին պաշտոններ զբաղեցնել Ռուսաստանի Դաշնության որոշ պետական ձեռնարկություններում։
Այն նաև արգելում է Ռուսաստանի ծովային ռեգիստրի հետ բոլոր գործարքները։
Կրիպտո ակտիվների գործող արգելքները ևս խստացվել են։
Փաթեթն ընդլայնում է ծառայությունների շրջանակը, որոնք այլևս չեն կարող տրամադրվել Ռուսաստանի կառավարությանը կամ Ռուսաստանում գրանցված իրավաբանական անձանց։
News.am