Միակողմանի զիջումները հանգեցնելու են ՀՀ ողջ անվտանգային համակարգի փլուզմանը

«Տավուշը հանուն հայրենիքի» քաղաքացիական նախաձեռնությունը հայտնել է, որ Տավուշի շրջանում միակողմանի զիջումները հանգեցնելու են ՀՀ ողջ անվտանգային համակարգի փլուզմանը, վտանգելու են ռազմավարական նշանակության ենթակառուցվածքները` նոր սպառնալիքներ ստեղծելով Հայոց պետության համար։

Տարածված հայտարարության մեջ նախաձեռնությունն անհամաձայնություն է հայտնել միակողմանի զիջումների պարտվողական տրամադրությանը։ Նախաձեռնությունը կոչով դիմել է ՀՀ բոլոր քաղաքացիներին և սփյուռքի հայրենակիցներին:

«Սա միայն Տավուշ աշխարհի կամ տավուշցու հարցը չէ, սա ամբողջ հայ ժողովրդի և Հայոց պետականության խնդիրն է։ Վճռական այս պահին միահամուռ կերպով կանգնենք պետական շահի, հայկական բանակի և տավուշեցու կողքին, ու միասին թույլ չտանք մեզ պարտադրվող նոր կործանարար զիջումները»,- շեշտել են տարածված հայտարարության մեջ։

Քաղաքացիական նախաձեռնությունն Իջևանում հանդիպում է անցկացրել, հայտնում է նախաձեռնության Ֆեյսբուքի էջը: Նշվում է, որ հանդիպման ընթացքում ելույթներ են ունեցել ՀՀ ԱԺ պատգամավոր Գառնիկ Դանիելյանը, գնդապետ Միհրան Մախսուդյանը, Աուդիտորների պալատի նախագահ Նաիրի Սարգսյանը և Տավուշի թեմի առաջնորդ Տեր Բագրատ արքեպիսկոպոս Գալստանյանը։

Պատգամավոր Դանիելյանը ներկայացրել է Տավուշի մարզի 4 գյուղի հնարավոր հանձնման հետևանքով ապասվելիք արհավիրքները։ Գնդապետ Մախսուդյանը կոչ է արել պայքարել, չվախենալ, միասնական լինել: «Հայրենիքն սկսվում է սահմաններից»,- Վազգեն Սարգսյանի խոսքերն է մեջբերել նա:

Մարտի 9-ին Ադրբեջանի փոխվարչապետ Շահին Մուստաֆաևի գրասենյակն անվանել էր այն սահմանամերձ գյուղերը, որոնք Բաքուն պահանջում է Երևանից։ Մարտի 18-ին ՀՀ վարչապետ Նիկոլ Փաշինյանը հայտարարել էր Բաքվի կողմից սահմանազատման նախապայմանների մասին։ Վարչապետի մամուլի ծառայությունը հայտնել էր, որ պայմանավորվածություն է ձեռք բերվել, ըստ որի՝ Ոսկեպար և Կիրանց բնակավայրերի ներկայացուցիչները պարբերաբար հանդիպում կունենան Սահմանազատման ու սահմանային անվտանգության հարցերով հանձնաժողովի անդամների հետ:

Armenia Today