Պատժամիջոցային ճնշման շարունակման դեպքում Իրանը դուրս կգա Միջուկային զենքի պայմանագրից

Իրանը կարող է դուրս գալ Միջուկային զենքի չտարածման մասին պայմանագրից և սկսել ուրանի 60%-ից ավելի բարձր մակարդակի հարստացումը, եթե երկրի նկատմամբ պատժամիջոցային ճնշումը շարունակվի: Ինչպես փոխանցում է Tasnim-ը, այս մասին հայտարարել է Իրանի խորհրդարանի ազգային անվտանգության և արտաքին քաղաքականության հանձնաժողովի ներկայացուցիչ Իբրահիմ Ռեզաին։

«Իրանն առայժմ միայն դադարեցրել է լրացուցիչ արձանագրության կամավոր կատարումը, սակայն մինչ օրս մնում է պայմանագրի անդամ։ Բայց պատժամիջոցային ճնշման շարունակման դեպքում օրակարգում կարող է հայտնվել պայմանագրից դուրս գալը, մինչև 60 % ուրանի հարստացումը, արդիականացված ցենտրիֆուգների արտադրությունն ու արտահանումը և միջուկային ոլորտում հարաբերությունների ընդլայնումը», – ասել է Ռեզաին։

Իրանի նախագահ Մասուդ Փեզեշքիանը հուլիսի 2-ին հրամանագիր է ստորագրել ՄԱԳԱՏԷ-ի հետ համագործակցությունը կասեցնող օրենքի իրագործման մասին: Երկրի ԱԳ նախարար Արաղչին նշել է, որ չնայած ՄԱԳԱՏԷ-ի հետ փոխգործակցությունը դադարեցնելու որոշմանը, համագործակցության ուղիները փակ չեն։

Իրանում որպես համագործակցության վերականգնման պայման են նշել երկրի միջուկային օբյեկտների և ատոմային գիտնականների անվտանգության ապահովումը: Փոխգործակցության դադարեցումը կապված է Ֆորդոյում, Սպահանում և Նաթանզում միջուկային օբյեկտներին ԱՄՆ-ի և Իսրայելի հարվածների ֆոնին ցուցաբերած անգործության համար ՄԱԳԱՏԷ-ի և գործակալության գլխավոր տնօրեն Ռաֆայել Գրոսիի հասցեին Իրանի քննադատության հետ:

Միջուկային զենքի չտարածման մասին պայմանագիրը միջազգային փաստաթուղթ է, որը մշակվել է ՄԱԿ-ի Զինաթափման կոմիտեի կողմից՝ նպատակ ունենալով կանխել միջուկային զենք ունեցող երկրների շրջանակի ընդլայնումը։

Sputnik Արմենիա