ՀՀ արտաքին գործերի նախարար Արարատ Միրզոյանը պարզաբանել է ԱՄՆ պետդեպարտամենտի՝ TRIPP նախագծի վերաբերյալ հայտարարության մեջ «երրորդ երկրների» մասին հիշատակումը։
Ապրիլի 10-ին էստոնացի գործընկերոջ հետ Երևանում համատեղ մամուլի ասուլիսում Միրզոյանը, պատասխանելով ամերիկյան հայտարարության իմաստի մասին հարցին, նշել է, որ չնայած անբարենպաստ, մեղմ ասած, համաշխարհային զարգացումներին, նախագծի ուղղությամբ աշխատանքները շարունակվում են։ Նախարարի խոսքով՝ անհրաժեշտ փաստաթղթերի պատրաստումն ու հաստատումն այժմ ընթացքի մեջ են, կողմերն անընդհատ տեղեկատվություն են փոխանակում տարբեր հարցերի շուրջ իրենց դիրքորոշումների վերաբերյալ։ «Մենք հույս ունենք հնարավորինս շուտ սկսել շինարարությունը։ Դրա համար մեզ անհրաժեշտ կլինեն երրորդ կողմեր։ Հայաստանի և ԱՄՆ-ի միջև համաձայնագիրը երկկողմանի է։ Սակայն շինարարության փուլում անհրաժեշտ կլինի երրորդ երկրների մասնակցությունը, հնարավոր է՝ նաև համակարգի կառավարման հարցերում»,- բացատրել է արտաքին գործերի նախարարը։
Նրա խոսքով՝ գաղտնիք չէ, որ նախագիծը բազմաթիվ երկրների շահերից է բխում՝ Չինաստանից մինչև Պորտուգալիա, չհաշված անմիջական հարևաններին։ Նախարարը հիշեցրել է, որ «Թրամփի ճանապարհ» նախագիծը մի ծայրում ավարտվում է Ադրբեջանում, մյուս ծայրում՝ Նախիջևանում, սակայն դրա տրամաբանական շարունակությունը Երասխով կապն է հայկական երկաթուղիների և Կարս-Գյումրու միջոցով՝ թուրքական ճանապարհների հետ։ Ծրագրով հետաքրքրված են Կենտրոնական Ասիայի երկրները։ Հարցը քննարկվել է Ղազախստանի արտաքին գործերի նախարարի և տրանսպորտի նախարարի վերջերս կատարած այցի ժամանակ։
News.am
