Ադրբեջանը Իտալիայից գնված Leonardo C-27J ռազմատրանսպորտային ինքնաթիռի հետ կապված խնդիրների է բախվել ։
Բաքուն 2023 թվականին իտալական Leonardo ընկերությունից գնել է երկու C-27 Spartan ռազմատրանսպորտային ինքնաթիռ։
2024 թվականի հունիսին տեղի է ունեցել ինքնաթիռներից առաջինի շնորհանդեսը։ Այն Բաքվի օդանավակայանում ներկայացվել է Ադրբեջանի նախագահ Իլհամ Ալիևին։
Ըստ ադրբեջանական լրատվամիջոցների՝ միջոցառմանը ներկա են եղել Իտալիայի պաշտպանության նախարար Գուիդո Կրոսետտոն, Իտալիայի արտաքին գործերի և միջազգային համագործակցության փոխնախարար Էդմոնդո Չիրիելլին և Leonardo-ի նախագահ Ստեֆանո Պոնտեկորվոն։
Հենց այս ինքնաթիռն է, ըստ երևույթին, խնդիրներ առաջացրել։ Այս եզրակացությունը կարելի է անել ելնելով այն փաստից, որ ինքնաթիռը աշնանը հետ է ուղարկվել Իտալիա և այնտեղ մնացել մինչև 2025 թվականի ամառ։
Այնուհետև ինքնաթիռը վերադարձել է Ադրբեջան Իտալիայից պատվիրված երկրորդ ինքնաթիռի հետ միասին։
Վերադարձված ինքնաթիռը մի քանի թռիչքներ է կատարել Ադրբեջանում, որից հետո՝ 2025 թվականի նոյեմբերին, վերադարձել է Թուրին, որտեղ էլ գտնվում է մինչ օրս։
Ավելին, վերջին օրերին ինքնաթիռը սկսել է թռչել Թուրինի շուրջ. այս թռիչքները Flightradar-ում նշված են որպես «prova», որը իտալերենից թարգմանաբար նշանակում է «փորձարկում»:
Sputnik Արմենիա
