Ադրբեջանի արտաքին գործերի նախարար Ջեյհուն Բայրամովը հստակ բացատրել է, թե ինչ է Բաքուն նկատի ունենում «Զանգեզուրի միջանցք» արտահայտության տակ։
«Թյուրքական պետությունների կազմակերպության (ԹՊԿ) անդամ պետությունները, իրենց աշխարհագրական դիրքի շնորհիվ, ձևավորում են բնական տրանսպորտային, լոգիստիկ և տարանցիկ ուղիներ՝ կամրջի դեր կատարելով Եվրոպայի և Ասիայի միջև»,– հայտարարել է Ջեյհուն Բայրամովը Թյուրքական պետությունների կազմակերպության արտաքին գործերի նախարարների խորհրդի նիստում։
«Այս ուղղությամբ ԹՊԿ անդամ պետությունները հսկայական հնարավորություններ ունեն։ Այս երթուղին նաև Միջին միջանցքի անբաժանելի մասն է։ Վաշինգտոնի գագաթնաժողովի շրջանակներում TRIPP երթուղու մասին հայտարարությունը, որը կապահովի անխոչընդոտ կապ Ադրբեջանի արևմտյան շրջանների և Նախիջևանի միջև՝ Զանգեզուրի միջանցքով, նույնպես կարևոր քայլ է մեր տարածաշրջանում կապերի դիվերսիֆիկացիայի տեսանկյունից»,– հայտարարել է Բայրամովը։
Այսպիսով, «Զանգեզուրի միջանցքը» չի կարող այլ բան լինել, քան Հայաստանի Սյունիքի մարզի մի մասը։ Հիշեցնենք, որ ավելի վաղ ՀՀ վարչապետ Նիկոլ Փաշինյանը ենթադրել էր, որ Բաքվում «Զանգեզուրի միջանցք» կարող են անվանել, օրինակ, Հորադիզ-Զանգելան ճանապարհ։
News.am
