ՀՀ Ազգային ժողովի խոսնակ Ալեն Սիմոնյանը որևէ իրավական հիմք չի տեսնում 44-օրյա պատերազմի հանգամանքները ուսումնասիրող հանձնաժողովի զեկույցը Ազգային ժողովի լիագումար նիստին ներկայացնելու համար։ Այս մասին Սիմոնյանը հայտարարել է հոկտեմբերի 1-ին Ազգային ժողովում լրագրողների հետ զրույցում։
Սիմոնյանը նշել է, որ ինքը խնդրել է Պետաիրավական հարցերի հանձնաժողովի, Ազգային ժողովի իրավաբանական վարչության և Ազգային ժողովի քարտուղարության կարծիքը, սակայն կարծիքները նույնական են եղել՝ դրանք լիագումար նիստին ներկայացնելու վերջնաժամկետն անցել է։
Ի պատասխան այն բանի, որ Արարատ Միրզոյանի օրոք նմանատիպ իրավիճակում հարցը մտել էր լիագումար նիստի օրակարգ, Սիմոնյանը հայտարարել է, որ ծանոթ չէ, թե Միրզոյանն ինչ է արել և որ ԱԺ-ն չի գործում նախադեպային իրավունքով։ «Կրկնում եմ, կա ԱԺ կանոնակարգ, որի մեկնաբանությունը կատարում է Պետական-իրավական հարցերի հանձնաժողովը։ Կա նաև Իրավական վարչության և քարտուղարության ղեկավարի տեղեկանքը։ Նրանց եզրակացությունները նույնական են։ Քոչարյանը կարող է մեկնաբանել, ինչպես կամենա, բայց ես նախադեպով չեմ առաջնորդվելու»,- հավաստիացրել է Սիմոնյանը։
Խոսնակը մերժել է Անդրանիկ Քոչարյանի հետ լարված հարաբերությունների մասին ենթադրությունը՝ կրկնելով, որ խոսքը պարզապես տարբեր մեկնաբանությունների մասին է, ուրիշ ոչինչ։ Սիմոնյանը նաև վստահեցրել է, որ Քոչարյանը իրեն դեռ զեկույց չի ուղարկել։
Մեկ այլ ենթադրություն, թե իշխանությունները՝ ի դեմս վարչապետի, կարող են խոչընդոտել զեկույցի լսումներին, Սիմոնյանը մեկնաբանել է հիշեցումով, որ հետաքննությունը նախաձեռնել են իշխանությունները և հենց իշխանություններն էլ շահագրգռված են ամբողջ ճշմարտությունը բացահայտելու հարցում։ «Բայց դա լինելու է լիագումար նիստում, լսումների ժամանակ, թե այլ կերպ, դա ամենակարևորը չէ, միևնույն է, արդյունքները կհրապարակվեն, բնականաբար, ոչ ամբողջությամբ, հաշվի առնելով նյութերի գաղտնիությունը։ Հիմա խոսքը զեկույցը լիագումար նիստի օրակարգում ընդգրկելու մասին է։ Իրավական հիմքեր ես դրա համար չեմ տեսնում։ Մնում է մի հատ էլ Հռոմի Պապից հարցնել։ Կարդացեք կանոնակարգով սահմանված ժամկետները։ Ժամկետներն ավարտվել են։ Ավելի քան 2,5 տարի է անցել։ Հանձնաժողովի լիազորությունները հավերժ չեն տրվում»,— հայտարարել է Սիմոնյանը, միաժամանակ նա չի հաստատել, որ Քոչարյանը խախտել է հանձնաժողովի աշխատանքային ժամկետները, «ուղղակի գործը մասշտաբային է»։ Սիմոնյանի խոսքով՝ Անդրանիկ Քոչարյանը սխալ է մեկնաբանում կանոնակարգը. «Հարգելով նրան՝ ես հարցում եմ կատարել, իսկ արդյունքների մասին նոր պատմեցի ձեզ»։
Ազգային ժողովի նախագահը կարծում է, որ զեկույցը կարող է քննարկվել լսումների ժամանակ։ «Քոչարյանի հետ որևէ վեճ չկա, միայն մեկնաբանությունների տարբերություններ կան», – կրկնել է Սիմոնյանը՝ հավելելով. «Թող նախ նա ներկայացնի զեկույցը, ինչը նա դեռ չի արել»։
Հիշեցնենք, որ Անդրանիկ Քոչարյանը հակառակն է պնդում. «44-օրյա պատերազմի հանգամանքների հետաքննության վերաբերյալ զեկույցի պատրաստման և ներկայացման ժամկետները չեն խախտվել», – սեպտեմբերի 22-ին լրագրողների հետ զրույցում հայտարարել է հանձնաժողովի ղեկավար Անդրանիկ Քոչարյանը։
News.am
