Ամերիկյան նավթային ընկերությունները կարող են շուրջ 63 միլիարդ դոլարի լրացուցիչ շահույթ ստանալ Պարսից ծոցում պատերազմով պայմանավորված նավթի գների կտրուկ աճի ֆոնին։ Այս մասին հայտնում է Financial Times թերթը՝ հղում անելով վերլուծաբանների գնահատականներին։
Ըստ Jefferies ներդրումային բանկի և Rystad Energy խորհրդատվական ընկերության տվյալների, հակամարտության սկզբից նավթի համաշխարհային գների աճը զգալիորեն ավելացրել է ԱՄՆ նավթարդյունահանող ընկերությունների եկամուտները։ Եթե գները պահպանվեն մեկ բարելի դիմաց մոտ 100 դոլարի մակարդակում, ամերիկյան արտադրողները տարվա ընթացքում կարող են շուրջ 63,4 միլիարդ դոլարի լրացուցիչ դրամական հոսք ստանալ։
Հակամարտության սկզբից ի վեր նավթի արժեքը կտրուկ աճել է. ամերիկյան West Texas Intermediate էտալոնային տեսակը մոտեցել է մեկ բարելի դիմաց 100 դոլարի նշագծին։ Հիմնական պատճառը Պարսից ծոցի տարածաշրջանից մատակարարումների ընդհատման ռիսկն է և Հորմուզի նեղուցով նավթի տեղափոխման հնարավոր սահմանափակումները. այս նեղուցով է անցնում հումքի համաշխարհային մատակարարումների զգալի մասը։
Վերլուծաբանները նշում են, որ ստեղծված իրավիճակից հատկապես կարող են շահել ամերիկյան թերթաքարային ընկերությունները, որոնք նավթն արդյունահանում են հիմնականում ԱՄՆ-ի ներսում և քիչ են կախված Մերձավոր Արևելքի ենթակառուցվածքներից։
News.am
