ԱՄՆ նախագահ Դոնալդ Թրամփի վարչակազմի ներկայացուցիչները հայտարարել են ողջ Կալիֆոռնիայում նպաստների հետ կապված խարդախության լայնածավալ հետաքննության մասին՝ վկայակոչելով «օտարերկրյա սուբյեկտների» կողմից իրականացվող համակարգված ջանքերը, որոնց նպատակն է միլիարդավոր դոլարներ կորզել պետական առողջապահական համակարգից, հայտնում է LA Times-ը:
Ստուգումները, ըստ երևույթին, ուղղված են հոսպիսային ծառայությունների կեղծ մատակարարների դեմ, որոնց առաջին անգամ հայտնաբերել էր Times-ը 2020 թվականին, իսկ ավելի ուշ հետաքննել էր Կալիֆոռնիայի գլխավոր դատախազ Ռոբ Բոնտան:
«Տնային պայմաններում բժշկական սպասարկման հաշիվների 18 տոկոսն ամբողջ երկրում բաժին է ընկնում Լոս Անջելեսի շրջանին. ինչպե՞ս է դա հնարավոր»,- ասել է Medicare և Medicaid Services կենտրոնների ադմինիստրատոր, դոկտոր Մեհմեդ Օզը: «Միայն Լոս Անջելեսի շրջանում հոսպիսների և տնային բժշկական սպասարկման վրա ծախսվում է մոտ 3,5 միլիարդ դոլար»,- հավելել է նա:
Ավելի վաղ Վաշինգտոնը սառեցրել էր 10 միլիարդ դոլարի դաշնային ֆինանսավորումը Կալիֆոռնիայում, Նյու Յորքում, Կոլորադոյում, Իլինոյսում և Մինեսոտայում երեխաների խնամքի համար՝ «հարկատուների փողերի համատարած խարդախության և ոչ նպատակային օգտագործման հետ կապված լուրջ մտահոգությունների» պատճառով:
«Այն, ինչ տեղի է ունենում Մինեսոտայում, խամրում է Կալիֆոռնիայի խարդախության մակարդակի համեմատ»,- ասել է Լոս Անջելեսի գլխավոր դաշնային դատախազ Բիլ Էսեյլին՝ նկատի ունենալով նախորդ տարվա վերջին նահանգի սոմալիական համայնքում նպաստների հետ կապված սկանդալը:
Ուրբաթ ներկայացված հայցում նահանգների գլխավոր դատախազները երեխաների խնամքի հիմնադրամի ֆինանսավորման սառեցումն անվանել են բացահայտ քաղաքական՝ հայտարարելով, որ վարչակազմն օգտագործել է խարդախության մեղադրանքները ներգաղթյալներին սոցիալական պաշտպանության համակարգի բացերի համար մեղադրելու և քաղաքական մրցակիցներին կոռուպցիայի մեջ մեղադրելու համար: Ուրբաթ կայացած ճեպազրույցի ժամանակ Օզը և Էսեյլին լրագրողներին պատմել են, որ «օտարերկրյա ազդեցությունը» դատարկում է պետական առողջապահական ծրագրերը՝ բժշկական օգնությունն անհասանելի դարձնելով ամերիկացիների համար, մինչդեռ Կալիֆոռնիայի առաջնորդները աչք են փակում դրա վրա:
«Այս ջանքերից շատերում ներգրավված են ռուսական, հայկական բանդաներ, մաֆիա,- ասել է Օզը:- Այս նախագահը չի հանդուրժի, որ ամերիկացիները ենթարկվեն օտարերկրյա ազդեցության»:
Էսեյլին, իր հերթին, մեղքը բարդել է նահանգապետ Գևին Նյուսոմի վրա:
«Կարծում եմ՝ նա թույլ է տվել ավելի շատ խարդախություն, քան մենք երբևէ տեսել ենք ամերիկյան պատմության մեջ,- ասել է Էսեյլին:- Պարզապես նայեք «Կալիֆոռնիա թագավորությունում» կատարված խարդախությունների քանակին: Նա խարդախության թագավորն է»:
Նահանգապետը պատասխան հարված է հասցրել Թրամփի վարչակազմի՝ անօրինականության մասին հռետորաբանությանը հինգշաբթի օրն ունեցած իր ելույթում: Նյուսոմը հայտարարել է, որ երկիրը բախվում է «մեր արժեքների դեմ հարձակման, որի նմանը ես իմ կյանքում երբևէ չեմ տեսել», և վկայակոչել է վիճակագրությունը, որը ցույց է տալիս, որ բռնի հանցագործությունների մակարդակը պատմական նվազագույնի վրա է:
News.am
