Սուրբ Թադեոս և Բարդուղիմեոս առաքյալների պատգամը դարերի խորքից միշտ առաջնորդում է լինել հավատարիմ Ավետարանի պատգամներին, Քրիստոսի լույսին։ Մայր աթոռ Սուրբ Էջմիածնում լրագրողների հետ զրույցում այս մասին ասաց Եսայի քահանա Արթենյանը` անդրադառնալով Աստվածամուխ սուրբ գեղարդը Մայր աթոռի գանձարանից դուրս բերելուն։
Այսօր Հայաստանյայց առաքելական եկեղեցին նշում է հայոց առաջին լուսավորիչներ Սուրբ Թադեոս և Սուրբ Բարդուղիմեոս առաքյալների տոնը: Այս օրը հռչակված է նաև որպես Աստվածամուխ սուրբ գեղարդի ուխտի օր, երբ հավատացյալների օրհնության համար դուրս է բերվում Մայր աթոռ Սուրբ Էջմիածնում պահվող համաքրիստոնեական սրբությունը:
«Սուրբ Թադեոս և Բարդուղիմեոս առաքյալների քարոզչությունը հայերի կյանքում մեծ նշանակություն է ունեցել։ Հայաստանում Քրիստոսի եկեղեցու հաստատման այս իրողությունը զուտ պատմական փաստ չէ, որ մենք ամեն տարի արձանագրում ենք և դրանով ավարտում։ Սա կարևոր խորհուրդ է յուրաքանչյուրիս համար, որովհետև Թադեոս և Բարդուղիմեոս առաքյալների քարոզչության շնորհիվ լուսավորվեց նաև հայ ազգը։ Եվ այս լույսը դարեր շարունակ մեզ կերտեց իբրև ազգ, իբրև ժողովուրդ, ստեղծեց մեր մշակույթը, ստեղծեց մեր պայքարի ու հաղթանակների ճանապարհը, և այս իմաստով, Թադեոս և Բարդուղիմեոս առաքյալների պատգամը դարերի խորքից միշտ մեզ առաջնորդում է լինել հավատարիմ Ավետարանի պատգամներին, Քրիստոսի լույսին»,–ասաց տեր Եսային։
Նա շեշտեց, որ այս դժվար ժամանակներում ցանկացած վերապրում, ցանկացած արժևորում ուժ է տալիս հաղթահարելու փորձությունները, որովհետև մարդը միայն սեփական ուժերին ապավինելով չի կարող այս կյանքում հաջողություններ ու հաղթանակներ արձանագրել։
«Մեր բոլոր փորձությունների ու դժվարությունների մեջ մենք ամեն ինչ հաղթահարել ենք Աստծո օգնությամբ, որովհետև այս սրբություններից բխող օրհնությունը մեզ ուժ է տալիս պայքարելու ճշմարիտ ճանապարհի համար, լինել ամուր ու հաստատակամ»,– նշեց նա։
Հիշեցնենք` Աստվածամուխ սուրբ գեղարդը, որը հավատացյալների երկրպագության համար Մայր տաճարում կմնա մինչև ժամը 18։00–ն։
Sputnik Արմենիա
