Դոհայում Արաբական լիգայի և Իսլամական համագործակցության կազմակերպության (ԻՀԿ) գագաթնաժողովի մասնակիցները կոչ են արել վերանայել Իսրայելի հետ դիվանագիտական և տնտեսական հարաբերությունները՝ Կատարին Իսրայելի կողմից իրականացված օդային հարվածից հետո։ Այս մասին ասվում է գագաթնաժողովի եզրափակիչ հայտարարության մեջ, հաղորդում է «Ինտերֆաքս»-ը։
Բացի այդ, գագաթնաժողովի մասնակիցները համերաշխություն են հայտնել Կատարին Իսրայելի հարվածից հետո՝ ընդգծելով, որ այս գործողությունը նպատակ ուներ խափանել Գազայի շուրջ խաղաղության բանակցությունները և լուրջ սպառնալիք է ներկայացնում տարածաշրջանային խաղաղության և կայունության համար։
Փաստաթղթի հեղինակները նաև «վճռականորեն մերժել են Իսրայելի կողմից պաղեստինցիներին բռնի կերպով վտարելու կամ էթնիկ զտումներ իրականացնելու ցանկացած փորձ և դատապարտել են օկուպացված պաղեստինյան հողերը բռնակցելու ծրագրերը»։
Բացի այդ, Դոհայում գագաթնաժողովի շրջանակներում տեղի է ունեցել Պարսից ծոցի արաբական պետությունների համագործակցության խորհուրդը (ՊԱԽ), որից հետո հայտարարվել է, որ Իսրայելի հարվածի կապակցությամբ կիրականացնի կոլեկտիվ պաշտպանությունն ապահովելու մեխանիզմ։
«ՊԱԽ Գերագույն խորհուրդը հայտարարել է, որ ամենախիստ կերպով դատապարտում է Իսրայելի հարձակումը և Կատարի ինքնիշխանության կոպիտ խախտումը, և որ կակտիվացնի Պարսից ծոցի պետությունների համատեղ պաշտպանական մեխանիզմներն ու զսպման հնարավորությունները»,- մեջբերում է գործակալությունը հայտարարությունը։
Այս առումով խորհուրդը նաև հանձնարարական կտա համատեղ հրամանատարությանն անհրաժեշտ քայլեր ձեռնարկելու վերաբերյալ։
Այսօր նաև Իսրայելի վարչապետ Բենիամին Նեթանյահուն հայտարարել է, որ երկիրը պետք է պատրաստվի մեկուսացման։
«Մենք պետք է ավելի ու ավելի հարմարվենք ավտարկիայի տարրերով տնտեսությանը»,- Նեթանյահուի խոսքերն է մեջբերում ՏԱՍՍ-ը։
Վարչապետի խոսքով՝ Իսրայելը կարող է հայտնվել այնպիսի իրավիճակում, երբ իր պաշտպանական արդյունաբերությունը «կարգելափակվի»։
«Ստիպված կլինենք զարգացնել մեր սեփական պաշտպանական արդյունաբերությունը»,- հավելել է Նեթանյահուն։
Սեպտեմբերի 9-ին Իսրայելն ավիահարված էր հասցրել պաղեստինյան ՀԱՄԱՍ խմբավորման ղեկավարությանը Կատարի մայրաքաղաք Դոհայում։ Իսրայելցի պաշտոնյաները հայտարարել էին, որ հարվածն ուղղված էր շարժման բարձրագույն ղեկավարության դեմ։
Armenia Today
