Հայաստանի Հակակոռուպցիոն կոմիտեի ղեկավար Արթուր Նահապետյանը կոռուպցիոն բաղադրիչ չի տեսնում բարձրաստիճան պաշտոնյաներին տրվող պարգևավճարների հետ կապված սկանդալում։ Այս կարծիքը նա հայտնել է փետրվարի 24-ին լրագրողների հետ զրույցում։
Կոմիտեի ղեկավարը հիշեցրել է, որ այս թեմայով բազմիցս արտահայտվել են տարբեր պաշտոնյաներ, այդ թվում՝ վարչապետը։
Նահապետյանը հայտարարել է, որ որպես իրավաբան կարող է ասել՝ «կոռուպցիա» հասկացությունը գնահատվում է ըստ Քրեական օրենսգրքի համապատասխան հոդվածների։
«Ձեր նկարագրած դեպքը որևէ հոդվածի չի համապատասխանում», – կարծում է Նահապետյանը: Նրա խոսքով՝ պարգևավճարների չափը որոշվել է կառավարության կողմից սահմանված կարգով:
Այն հարցին, թե որքան է ինքն անձամբ ստացել, Նահապետյանը հայտարարել է, որ Կոմիտեն ներառված չէ այդ ցուցակում, իսկ իր բոլոր եկամուտները կարտացոլվեն հայտարարագրում: Մեկնաբանելով այն հարցը, թե արդյոք Կոմիտեն արդարացրել է հանրության սպասելիքները, Նահապետյանը հայտնել է, որ աշխատանքը գնահատում է դրական:
News.am
