Հայաստանի վարչապետ Նիկոլ Փաշինյանը խաղում է մայրերի վախի վրա: Ֆեյսբուքյան էջում նման գրառում է արել ՀՀ մարդու իրավունքների նախկին պաշտպան, «Միասնության թևեր» քաղաքական նախաձեռնության վարչապետի թեկնածու Արման Թաթոյանը` անդրադառնալով Փաշինյանի հայտարարություններին։
Փաշինյանը մարտի 19–ին լրագրողների հետ զրույցում ասաց, որ 2026 թվականի խորհրդարանական ընտրություններում ընդդիմության հաղթանակի դեպքում ամենաուշը սեպտեմբերին պատերազմ կլինի` ծանր հետևանքներով։
«Նիկոլ Փաշինյանը մեր մայրերի վախն օգտագործում է` որպես նախընտրական գործիք։ Բայց նա դա անում է ոչ թե մայրերին պաշտպանելու համար, ոչ թե հանուն մեր 18-19 տարեկան երիտասարդների, այլ իր վերարտադրության համար։ Սրանք տարբեր բաներ են։ Իրականում անվտանգության իրական սպառնալիքը գոյություն ունի, և դրա իրական աղբյուրը ոչ թե ինքնին վարչապետի փոփոխությունն է, այլ իրավական երաշխիքների բացակայությունը, միջազգային դատարանների չկատարված որոշումները, դրա հետևից չգնալը, ինչպես նաև սեփական քաղաքացիներից թաքուն պահվող պայմանավորվածությունները»,– գրել է Թաթոյանը։
Նա նշել է, որ տարիներ շարունակ ՀՀ մարդու իրավունքների պաշտպանի պաշտոնում արձանագրել է նույն բանը` վախն օգտագործվում է որոշումների կայացումն արգելակելու համար։ Թաթոյանի խոսքով` անվտանգությունը մեկ մարդ ու այդ մեկ մարդու իշխանությունը չէ, այլ այն միջազգային մեխանիզմներն են, պայմանագրեր, խորհրդարանական վերահսկողություն և այլն։
«Հայաստանը ՄԱԿ-ի արդարադատության միջազգային դատարանի անդամ է։ Դատարանի որոշումը փաստաթուղթ է։ Ես գիտեմ, թե ինչպես է այն գործում և ինչպես կարելի է հասնել դրա կատարմանը, բայց այսօր այն չի կատարվում: Հայ ժողովուրդն արժանի է ոչ թե սպառնալիքների, այլ բացատրությունների։ Եվ ոչ թե խոստումների, այլ խելամիտ լուծումների»,– նշել է նա։
Հիշեցնենք` Փաշինյանը ՀՀ 2–րդ նախագահ Ռոբերտ Քոչարյանի, գործարար, բարերար, «Ուժեղ Հայաստան» կուսակցության նախագահ Սամվել Կարապետյանի և քաղաքական գործիչ, գործարար Գագիկ Ծառուկյանի ղեկավարած ուժերին է մեղադրում Հայաստանի և Ադրբեջանի միջև հաստատված խաղաղությունը վերանայելու, վերաբանակցելու քաղաքականության մեջ։
Sputnik Արմենիա
